Vystava tvoraŭ z kalekcyi kniazia Macieja Mikałaja Radziviła «Radziviły: losy krainy i rodu» adkryłasia 15 lutaha ŭ Nacyjanalnym mastackim muziei Biełarusi, pieradajuć «Minsk-Naviny».
«My pryvieźli i žyvapisnyja partrety, i hraviury, i litahrafii XIX stahodździa, i miedali, jość dva tvory tkactva — makata i słucki pojas, — raspaviadaje kuratar vystavy — zahadčyca adździeła staražytnabiełaruskaha mastactva Alena Karpienka. — Ekspazicyja nosić pierš za ŭsio paznavalny charaktar, u joj sabrany tvory mastactva roznaha mastackaha ŭzroŭniu. Mnohija partrety stvaralisia siabrami siamji ci pradstaŭnikami rodu. Ale viadoma, što dla Radziviłaŭ pracavali i bujnyja mastaki. Na vystavie, naprykład, pradstaŭleny partret ruki Francyska Ksavieryja Łampi».
Ekspanaty raźmieščany ŭ chranałahičnym paradku, pry hetym uličanyja svajackija suviazi kniaskaha rodu. Kab razabracca ŭ ich, možna źviarnucca da hienieałahičnaha dreva Radziviłaŭ, jakoje taksama pradstaŭlena na vystavie.
«Adzin z unikalnych ekspanataŭ — pachavalny partret Karala Stanisłava Radziviła, — kaža kuratar. — U svoj čas kožny sarkafah u krypcie kaścioła Božaha Cieła ŭ Niaśvižy ŭpryhožvaŭ padobny partret. Sarkafahaŭ zachavałasia kala 70. Padobnych partretaŭ na terytoryi Biełarusi ŭsiaho dva. Adzin u nas, a druhi ŭ Słonimskim rajonnym krajaznaŭčym muziei, ale jon adnosicca da rodu Pacaŭ».
Tvory z kniažackaj kalekcyi dapaŭniajuć knihi ź biblijateki Radziviłaŭ i dakumienty, pradastaŭlenyja Nacyjanalnaj biblijatekaj Biełarusi i histaryčnym archivam. Taksama na vystavie možna ŭbačyć partrety z muziejnaha zboru.
«Pastajannaja ekspazicyja radziviłaŭskich partretaŭ isnuje z momantu adkryćcia mastackaha muzieja, — tłumačyć Alena Karpienka. — Adrazu ich było litaralna dva-try. My ŭvieś čas pašyrali kalekcyju. U 2006-m adkryli najbujniejšuju pastajannuju ekspazicyju, kudy ŭvajšło kala 30 partretaŭ. Potym časova pieradali na ekspanavańnie 17 tvoraŭ u Niaśvižski zamak. Ciapier jany ŭsie viarnulisia. Paśla zakryćcia časovaj vystavy carkoŭnaha mastactva «Śviet niabiesny na ziamli» radziviłaŭskija partrety viernucca ŭ pastajannuju ekspazicyju».
Kniaź Maciej Mikałaj Radzivił 27 lutaha pryjedzie ŭ Minsk, kab asabista paznajomić naviedvalnikaŭ Nacyjanalnaha mastackaha muzieja sa svajoj kalekcyjaj tvoraŭ. U Minsku jaje buduć demanstravać da 16 krasavika.
Kamientary