Viarchoŭny sud pryznaŭ zakonnym rašeńnie ab ekstradycyi błohiera Łapšyna ŭ Azierbajdžan

Sudovaja kalehija pa kryminalnych spravach Viarchoŭnaha suda Biełarusi 7 lutaha nie zadavoliła skarhu zatrymanaha ŭ Minsku rasijska-izrailskaha błohiera Alaksandra Łapšyna i pryznała zakonnym rašeńnie Minskaha haradskoha suda ab jaho ekstradycyi ŭ Azierbajdžan.

Pavialičyć

Rašeńnie źjaŭlajecca kančatkovym, abskardžańniu i apratestavańniu nie padlahaje.

Na razhlad apielacyjnaj skarhi Łapšyna ŭ sud nie dastaŭlali. Na abviaščeńni rezalutyŭnaj častki pastanovy suda prysutničali svajaki błohiera, a taksama pradstaŭnik pasolstva Rasii.

Žonka błohiera Kaciaryna, kamientujučy rašeńnie Viarchoŭnaha suda, zajaviła žurnalistam: «Heta aznačaje, što my praciahniem baraćbu dalej. Ja dumaju, vy bačyli pres-kanfierencyju prezidenta 3 lutaha (dzie Alaksandr Łukašenka prakamientavaŭ situacyju z zatrymańniem błohier). Z našaha boku ŭsio, što tolki možna było zrabić, my zrabili», — skazała jana.

«Kali čałaviek źjeździŭ u krainu i napisaŭ pra heta ŭ svaim błohu, pieraśledvać jaho za heta — dzikunstva», — zajaviła Kaciaryna.

Joj nieviadoma, ci była reakcyja z boku MZS Azierbajdžana na nakiravanyja tudy raniej listy Alaksandra Łapšyna i jaho maci z prośbaj ab vyzvaleńni.

Jak paviedamiła žurnalistam advakat Natalla Šepina, žonka błohiera nakiravała ŭ adździeł pa hramadzianstvie i mihracyi Minharvykankama chadajnictva ab padavańni Łapšynu na terytoryi Biełarusi dadatkovaj abarony, a taksama skarhu ŭ Kamitet AAN pa pravach čałavieka.

Łapšyn byŭ zatrymany ŭ Minsku 14 śniežnia 2016 hoda pa zapycie Azierbajdžana, jaki abviaściŭ jaho ŭ mižnarodny vyšuk za niezakonnaje naviedvańnie Nahornaha Karabacha. Błohieru taksama inkryminujuć «publičnyja zakliki, nakiravanyja suprać dziaržavy». Łapšynu ŭ Azierbajdžanie pahražaje da vaśmi hadoŭ pazbaŭleńnia voli.

MZS Izraila źviartałasia da ŭładaŭ Biełarusi z prośbaj nie ekstradavać Łapšyna ŭ Azierbajdžan. Akramia taho, Izrail pa dypłamatyčnych kanałach damahaŭsia ad Baku spynieńnia kryminalnaha pieraśledu błohiera, paviedamlali izrailskija ŚMI. Rasija taksama vystupiła suprać ekstradycyi Łapšyna ŭ Azierbajdžan — pra heta zajaviŭ 17 studzienia ministr zamiežnych spraŭ RF Siarhiej Łaŭroŭ. Aktyŭny ŭdzieł u losie zatrymanaha błohiera brali pradstaŭniki pasolstvaŭ Izraila i Rasii ŭ Biełarusi.

Rašeńnie Hienprakuratury Biełarusi ab ekstradycyi było ŭručanaje Łapšynu 18 studzienia. Jon jaho biezvynikova abskardziŭ u Minskim haradskim sudzie 26 studzienia. Zatym była padadzienaja skarha ŭ Viarchoŭny sud.

• 0
• 0
• 0
• 0
• 0
• 0
• 0
• 0