U Francyi abmiežavali prodaž sałodkich napojaŭ u restaranach i kafe ŭ metach baraćby z prablemaj atłuścieńnia, piša VVS.
Z hetaj piatnicy restarany nie zmohuć prapanoŭvać svaim klijentam bieźlimitny dostup da sałodkich napojaŭ za fiksavanuju canu abo biaspłatna.
Havorka idzie ab papularnaj u restaranach chutkaha charčavańnia praktycy, kali klijent płacić tolki za šklanku i moža nieabmiežavanuju kolkaść razoŭ jaje napoŭnić. Časam takaja sistema dziejničaje ŭ stałovych.
Zabarona datyčycca ŭsich vidaŭ prachaładžalnych napojaŭ, jakija ŭtrymlivajuć cukar abo padsałodžvalniki. Siudy ž adnosiacca roznyja spartyŭnyja napoi.
Takaja sistema raspaŭsiudžana i ŭ inšych krainach Jeŭropy. U Biełarusi jana sustrakajecca ŭ niekatorych sietkach chutkaha charčavańnia.
Pavodle danych Jeŭrastata, uzrovień atłuścieńnia ŭ Francyi ŭ darosłych ludziej składaje 15,3% — heta krychu nižej za siaredni dla Jeŭropy ŭzrovień 15,9%. Adnak va ŭzroście starejšyja za 30 hadoŭ na atłuścieńnie pakutujuć amal 57% francuzaŭ i 41% francužanak.
Suśvietnaja arhanizacyja achovy zdaroŭja nieadnarazova papiaredžvała pra škodu sałodkich napojaŭ, pierš za ŭsio haziroŭki. SAAZ źviazvaje hetyja napoi z rostam uzroŭniu atłuścieńnia i dyjabietu.
SAAZ rekamiendavała krainam uvodzić padatki na sałodkija napoi, kab źnizić ich spažyvańnie.
U Francyi ŭžo dziejničaje padatak na achaładžalnyja napoi, a taksama zabarona na viendynhavyja aŭtamaty ŭ škołach.
10-pracentny padatak na prodaž sałodkich napojaŭ dziejničaje i ŭ Mieksicy. U pieršy hod paśla jaho ŭviadzieńnia spažyvańnie napojaŭ ŭpała na 6%.
Kamientary