Čamu sioleta Kanhres daśledčykaŭ Biełarusi projdzie ŭ Varšavie, a nie Kaŭnasie? Tłumačyć Kazakievič

Siomy Mižnarodny kanhres daśledčykaŭ Biełarusi adbudziecca 15—17 vieraśnia ŭ Varšavie. Usie papiarednija adbyvalisia ŭ Kaŭnasie. Čamu źmieniena miesca? 

Pryčyny try, adkazaŭ kaardynatar Kanhresu Andrej Kazakievič. 

«Pa-pieršaje, u Varšavu ŭdasca pryciahnuć novych udzielnikaŭ z zachodnich krain, jakija z łahistyčnych pryčyn nie dajazdžajuć da Koŭna. Pa-druhoje, udasca prasunuć idei Kanhresu ŭ novych akademičnych asiarodkach, kab nie było niebiaśpieki zamykańnia. Pa-treciaje, heta paspryjaje pošuku novych idej i temaŭ. Časam pamianiać miesca — heta samy prosta varyjant pačać dumać pa-novamu», — adznačaje doktar palityčnych navuk Andrej Kazakievič. 

Pavialičyć

Tradycyjna na Kanhresie źbirajecca ad 400 da 500 navukoŭcaŭ i ekśpiertaŭ ź Biełarusi i inšych krain, adbyvajucca dyskusii i prezientacyi. Akramia taho, na Kanhresie uručajucca premii za najlepšyja navukovyja publikacyi hoda.

«Razmova nie idzie pra pierajezd u Varšavu nazaŭsiody.

Pakul miarkujecca pravieści Kanhres tam razava, a paśla viarnucca ŭ kovienski ŭniviersitet imia Vitaŭta Vialikaha. Taksama abmiarkoŭvajecca ideja kožny hod mianiać miesca, kab pavialičvać adkrytaść i inavacyjnaść. Varšava, Biełastok, Vilnia, Miensk», — kaža Kazakievič.

Zbor zajavak na stvareńnie siekcyj i panelaŭ, a taksama zbor naminacyj na premiju Kanhresu za lepšuju navukovuju publikacyju buduć prachodzić pa 10 sakavika. Finalny śpis siekcyj budzie vyznačany da 20 maja. Papiaredniaja prahrama Kanhresu stanie viadomaja da 15 žniŭnia.

Mižnarodny kanhres daśledčykaŭ Biełarusi ŭpieršyniu prajšoŭ u 2011 hodzie. Inicyjatarami jaho praviadzieńnia vystupili Instytut «Palityčnaja śfiera», Instytut Vialikaha Kniastva Litoŭskaha i Univiersitet Vitaŭta Vialikaha.

Pavialičyć

Sioleta asnoŭnym akademičnym partnioram z polskaha boku vystupić navučalnaja ŭstanovy Collegium Civitas, u jakoj navučajucca i biełarusy.

«Šmat uvahi sioleta budzie nadavacca biahučym padziejam u śviecie: rostu niaŭstojlivaści, papulizmu, radykalizmu, i jak heta ŭsio ŭpłyvaje i jakija vykliki stavić pierad Biełaruśsiu», — skazaŭ «Našaj Nivie» Kazakievič.

Ci nie budzie daražej dabiracca da Varšavy, čym da Koŭna praź Vilniu? «U pryncypie, kali dabiracca praz Harodniu ci na aŭtobusach, to nie atrymlivajecca značna daražej, — kaža Andrej Kazakievič.

— Akramia hetaha, Varšava dla mnohich biełaruskich daśledčykaŭ sama saboj pryvabny horad, tamu my nie čakajem źnižeńnia kolkaści ŭdzielnikaŭ», — adznačaje jon.

• 0
• 0
• 0
• 0
• 0
• 0
• 0
• 0