Minharsud pakinuŭ u sile pryhavor bajkieru, jaki ŭčyniŭ DTZ z udziełam supracoŭnika DAI

Minski haradski sud 10 studzienia pakinuŭ u sile pryhavor suda Centralnaha rajona bajkieru Siarhieju Šaŭcovu, pryznanamu vinavatym u DTZ, u jakim surjozna paciarpieŭ supracoŭnik DAI. Apielacyjnyja skarhi abvinavačanaha i jaho abaroncaŭ zastalisia biez zadavalnieńnia.

28 kastryčnika 2016 hoda rajonny sud pryznaŭ Šaŭcova vinavatym u supraciŭleńni supracoŭniku milicyi i parušeńni praviłaŭ darožnaha ruchu, što paciahnuła pa nieaściarožnaści pryčynieńnie ciažkaha cialesnaha paškodžańnia supracoŭniku DAI. Bajkiera pryhavaryli da piaci hadoŭ pazbaŭleńnia voli ŭ kałonii ahulnaha režymu. Sud taksama abaviazaŭ Šaŭcova vypłacić paciarpiełamu 30 tysiač rubloŭ u jakaści maralnaj kampiensacyi.

Pavodle danych śledstva, 18 krasavika minułaha hoda na skryžavańni praśpiektaŭ Mašerava i Niezaležnaści Šaŭcoŭ, kirujučy matacykłam Suzuki Bandit, naŭmysna vyjechaŭ na tramvajnyja puci na zabaranialny sihnał śviatłafora, čym zabłakavaŭ ruch hramadskaha transpartu. Padyšoŭšy da kiroŭcy, supracoŭnik DAI zapatrabavaŭ zahłušyć ruchavik i pakazać dakumienty. Matacyklist pasprabavaŭ uciačy, pačaŭ ruch na zabaranialny sihnał śviatłafora. Matacykł vyjechaŭ na skryžavańnie, dzie sutyknuŭsia z aŭtamabilem inkasatarskaj słužby Volkswagen Transporter, jaki ruchaŭsia.

Šaŭcoŭ svajoj viny nie pryznaŭ, u rajonnym sudzie jon nastojvaŭ na tym, što sprabavaŭ praduchilić DTZ, ale nie zmoh, bo supracoŭnik DAI Uładzimir Taŭpiniec pavis u jaho na ruli. Heta pryviało da ruchu matacykła i nastupnaha sutyknieńnia z mašynaj inkasataraŭ, śćviardžaŭ bajkier.

Siońnia ŭ Minharsudzie kalehija pa kryminalnych spravach, razhladajučy hetuju spravu ŭ apielacyjnym paradku, adchiliła ŭsie chadajnictvy abvinavačanaha i jaho abarony. Šaŭcoŭ prasiŭ dastavić jaho ź SIZA, a abarona — dałučyć da materyjałaŭ spravy zaklučeńnie śpiecyjalista ab umiašańni supracoŭnika DAI ŭ kiravańnie matacykłam, ź jakoha vynikaje, što ŭ momant DTZ im kiravali dva kiroŭcy. Sud pieršaj instancyi admoviŭsia dałučyć heta zaklučeńnie da materyjałaŭ spravy. Siońnia pradstaŭnik Hienprakuratury i abaronca paciarpiełaha zajavili, što hetaje zaklučeńnie nie moža być dałučanaje da materyjałaŭ spravy, bo jano dadzienaje śpiecyjalistam, a nie ekśpiertam. Abarona taksama prasiła adkłaści razhlad spravy, bo abvinavačvany nakiravaŭ ź SIZA ŭ sud jašče adnu apielacyjnuju skarhu, jakaja pakul nie dajšła da suda.

U apielacyjnych skarhach abvinavačany i jaho abaroncy pakazvajuć, što prysud rajonnaha suda niezakonny i nieabhruntavany, a vysnovy nie padtrymlivajucca dokazami. Akramia taho, ličać jany, sud nie daŭ acenku ŭmiašańniu supracoŭnika DAI ŭ kiravańnie matacykłam. Abaroncy ŭpeŭnienyja ŭ nievinavataści Šaŭcova i prasili jaho apraŭdać. Jany taksama źviarnuli ŭvahu suda, što hramadzianskim adkazčykam pa hetaj spravie akramia samoha Šaŭcova pavinna być AAT «Bielinviestbank», mašyna jakoha źbiła i matacyklista, i milicyjaniera. Sud z hetym nie pahadziŭsia.

Paśla vyniasieńnia rašeńnia ciotka asudžanaha sprabavała źviarnucca da suda, zaklikaŭšy jaho «być śmiełym i razmaŭlać sa svaim sumleńniem», ale žančynie nie dali dahavaryć.

• 0
• 0
• 0
• 0
• 0
• 0
• 0
• 0