Prarasijski (abo rasijski) sajt patrabuje pasadzić u «amierykanku» biełaruskich analitykaŭ Sivickaha i Caryka
Sajt belvpo.com (Vajskova-palityčny ahlad) źmiaściŭ materyjał «Rusafoby Sivicki i Caryk pracujuć suprać biełaruskaha naroda i ryzykujuć apynucca ŭ «amierykancy». Aŭtaram publikacyi vystupiŭ niechta «Uładzimir Vujačyč» — heta vidavočny psieŭdanim i takoha čałavieka nie isnuje.
Kiraŭniki Centra stratehičnych i zamiežnapalityčnych daśledavańniaŭ Juryj Caryk i Arsień Sivicki nazyvajucca ŭ materyjale «psieŭdaekśpiertami, jaki staranna retranślujuć varožyja idei ŭ biełaruskuju miedyjaprastoru».
«Dla raspaŭsiudu idei ŭvarvańnia Rasii ŭ Biełaruś paračka junych «ekśpiertaŭ», jakija nie majuć ni śpiecyjalnaj adukacyi, ni viedaŭ, ni dośviedu, stvaryła navat ceły Centr stratehičnych i zamiežnapalityčnych daśledavańniaŭ, a, dakładniej, studencki hurtok pa intaresach (pałova analitykaŭ Centra, a ich usiaho šeść, źjaŭlajucca studentami minskich VNU!)», — havorycca ŭ materyjale.
«Sivicki śćviardžaje, što Rasija ŭvarviecca na tankach u Biełaruś, kab napaści na Ukrainu, krainy Bałtyi i Polšču. Heta značyć rasijskaja častka rehijanalnaj hrupoŭki vojskaŭ dźviuch krain budzie supraćstajać jaje biełaruskaj sastaŭnoj — Uzbrojenym siłam Biełarusi. Ci nie absurd? A moža heta metanakiravanaje nackoŭvańnie adnaho naroda na inšy? Vidavočna, z hetym pavinny raźbiracca ci psichijatry, ci śledčyja orhany», — piša ananim.
«U siłu adsutnaści žyćciovaha dośviedu, Sivicki i Caryk nie razumiejuć, što ich vykarystoŭvajuć suprać svajoj ža dziaržavy i naroda tolki z adnoj metaj — raskałoć hramadstva, pasiejać nianaviść, dyskredytavać orhany ŭłady i naviazać biełarusam čužyja im pohlady. I kali nie spynić padobnych dziejačaŭ-ekśpiertaŭ siońnia, to zaŭtra Biełaruś, jak i lubaja inšaja kraina, moža sutyknucca ź dziesiatkami, a to i sotniami padrychtavanych u śpiecškołach NATA funkcyjanieraŭ, jakija šturchajuć za hrošy svaje krainy ŭ prorvy chaosu», — robicca vysnova.
My paprasili prakamientavać publikacyju adnaho z hierojaŭ materyjała Arsienia Sivickaha.
«Heta nie pieršaha rodu takaja publikacyja, kali nas abvinavačvajuć u rusafobii praz krytyku stratehij Rasii na mižnarodnaj arenie. Reahavać na artykuł, napisany ananimam, jaki nie zdolny navat pracavać z našymi dadzienymi z adkrytych krynic, nie kažučy ŭžo ab niaviedańni vajskovych taktyčnych narmatyvaŭ, nie davodzicca. Za dva hady ŭ naš adras było dastatkova šmat padobnych artykułaŭ», — kaža spadar Sivicki.
Pa jaho słovach, upieršyniu takija paklopnickija materyjały źjavilisia paśla taho, jak ekśpierty pačali analiz pa raźmiaščeńni na terytoryi Biełarusi rasijskaj vajskovaj častki. Tady Caryk i Sivicki paličyli, što hety krok budzie supiarečyć nacyjanalnym intaresam Biełarusi. «Heta było b uciahvańnie Biełarusi ŭ padtrymku eskałacyjnaha kursu Rasijskaj Federacyi, a heta značyć pastavić sumnieŭ status Biełarusi jak rehijanalnaha donara stabilnaści».
Admietna, što na hety raz paklopnicki materyjał źjaviŭsia paśla publikacyi «Jak prajšli pieramovy ŭ Maskvie» ab sustrečy prezidentaŭ Biełarusi i Rasii ŭ listapadzie i «Aryšty prarasijskich publicystaŭ — inicyjatyva častki siłavoha błoka», dzie razhladajucca viersii ich zatrymańnia.
Što tyčycca sajta, dzie źjaviłasia publikacyja, to Sivicki nazyvaje jaho «źliŭnym bačkom, jaki pracuje ŭ intaresach zamiežnych struktur».
«Pakazalna i toje, što hety sajt zarehistravany ŭ rasijskaj damiennaj zonie i znachodzicca na servierach na terytoryi Rasii. Ale jon naležyć hramadzianinu Respubliki Biełaruś, jaki pražyvaje ŭ Minsku. Na žal, apošnim časam źjaŭlajecca šmat śviedkaŭ taho, što niekatoryja biełaruskija hramadzianie ŭciahnutyja ŭ «aktyŭnyja mierapryjemstvy» rasiejskaha boku, pry hetym nie tolki ŭ Biełarusi, ale i za miažoj».
«Hety sajt tranśluje idei, što padryvajuć davier da miralubnaj i pradkazalnaj zamiežnaj i vajskovaj palityki Biełarusi z boku mižnarodnaj supolnaści. Naprykład, adna ź ich — nibyta kiraŭnik Biełarusi Alaksandr Łukašenka pahadziŭsia na vajskovuju prysutnaść Rasii ŭ našaj krainie. Tuju samuju dumku rasijskija dypłamaty zakidvajuć u jeŭrapiejskich krainach, kab znoŭku ž padarvać imidž krainy».
«Vidavočna, što nijakaj zhody na apošnich pieramovach pamiž Łukašenkam i Pucinym dasiahnuta nie było. Heta b padryvała b nacyjanalny suvierenitet i ŭsie apošnija namahańni Biełarusi na mižnarodnaj arenie», — ličyć Sivicki.
Ciapier čytajuć
Łukašenka vykazaŭsia pra deficyt miedykaŭ i prapanavaŭ im pracavać bolš6
Kamientary