Čamu ekzarch Pavieł pakłaniŭsia mienavita siońnia? Zahadka dnia

ŚMI paviedamlajuć, što ekzarch Pavieł pavinšavaŭ Alaksandra Łukašenku z dniom Anioła. U suviazi z hetym u mianie paŭstaje šerah pytańniaŭ.

Kali heta kamunist (jon ža, pavodle samacharaktarystki, pravasłaŭny ateist) Łukašenka vybraŭ sabie za patrona Alaksandra Nieŭskaha, jaki poŭzaŭ na puzie pierad chanam? I čamu mienavita hety dzień, a nie jaki inšy?

U RPC, nahadaju, Alaksandra Nieŭskaha ŭšanoŭvajuć 4 razy: 5 červienia, 12 vieraśnia, 22 vieraśnia i 6 śniežnia pavodle novaha stylu.

Što tyčycca 6 śniežnia n. st., dyk heta dzień pachavańnia Alaksandra va Uładzimiry-na-Klaźmie (tahačasnaj stalicy, umoŭna kažučy, Zaleskaj Rusi; jašče niama Maskovii). A voś bližej da dnia naradžeńnia Łukašenki — 30 žniŭnia staroha stylu (12 vieraśnia novaha) — dzień pieraniasieńnia moščaŭ Nieŭskaha ŭ Picier. I heta HAŁOŬNAJE śviata u honar kniazia, kali słužbu ŭ jahony honar pravić maskoŭski patryjarch. Hety dzień i naležała b Łukašenku adznačać, a Paŭłu — z hetym dniom nizkapakłonna vinšavać. Tym bolš, što 30 žniŭnia st. st. uziata za dzień pieraniasieńnia moščaŭ nie prosta tak, a z taje pryčyny, što jakraz na hetuju datu prypadaje dzień śviatoha Alaksandra, archibiskupa Kanstancinopala (325—337?), adnaho z ajcoŭ Pieršaha Usialenskaha Saboru, umoŭna kažučy, druhoha Patryjarcha Kanstacinopalskaha, u honar jakoha, peŭna ž, achryścili i kniažyča Alaksandra Jarasłaviča.

Dzień 30 žniŭnia st. st. maje i palityčnuju, impierskuju afarboŭku. Jak viadoma, u dalokim 1240 h. kniaź Alaksandr Jarasłavič pieramoh u bitvie na Niavie šviedskaha jarła Birhiera. Voś da hetaha dnia, dnia sv. Alaksandra, Piotr Pieršy i prymierkavaŭ padpisańnie Ništackaha miru 1721 h. sa Šviecyjaj. Tak skončyłasia 2-ja Paŭnočnaja vajna ŭ Jeŭropie, u vyniku jakoj Rasija zachapiła Liflandyju, Estlandyju, Ižoru i častku Karelii, a caru nieŭzabavie sienatary padnieśli tytuł impieratara ŭsierasijskaha.

Ź jakoj racyi Pavieł pakłaniŭsia siońnia, dla mianie zahadka. Ci nie impierski składnik dnia 12 vieraśnia tamu pryčynaj? I čamu abaviazkova było abviaščać aniołam Alaksandra Nieŭskaha, a nie Alaksandra Kanstancinopalskaha? Cikava było b pasłuchać tłumačeńni.

Što ž tyčyć katalikoŭ abodvuch abradaŭ, dyk jany mahli b pavinšavać siońnia z dniom anioła Mikałaja Łukašenku, bo siońnia dzień śviatoha cudatvorca i ŭhodnika Mikałaja, biskupa Mir Likijskich. U pravasłaŭnych hetaje śviata 19 śniežnia, kali budzie 6-ja hadavina Kryvavaj niadzieli. 

• 0
• 0
• 0
• 0
• 0
• 0
• 0
• 0