Viarchoŭny narodny sud Kitaja apraŭdaŭ mužčynu, pakaranaha 21 hod tamu za zhvałtavańnie i zabojstva, paviedamlaje «Sińchua». Žycharu ŭschodniaj pravincyi Chebej Nie Šubiniu na momant pakarańnia byŭ 21 hod.
10 žniŭnia 1994 hoda inšy žychar hetaj ža pravincyi zajaviŭ u pravaachoŭnyja orhany ab źniknieńni svajoj dački. U śniežni taho hoda dziaŭčynu znajšli miortvaj u kukuruznym poli ŭ vakolicach Šicziačžuana, stalicy pravincyi. Adnak tady śledčym nie ŭdałosia ŭstanavić pryčyny i dakładny čas jaje hibieli. U vyniku adzinaha padazravanaha pa spravie - Šubinia - pryznali vinavatym i prysudzili da vyšejšaj miery pakarańnia. «Sińchua» nie ŭdakładniaje padrabiaznaściaŭ hetaj historyi - čamu Šubiń staŭ padazravanym, adkul jon i zabitaja dziaŭčyna viedali adzin adnaho i ci viedali naohuł.
Šubiń byŭ pakarany ŭ 1995 hodzie. U 2005 hodzie palicyja aryštavała 47-hadovaha sieryjnaha mańjaka Vana Šuczinia, jaki pryznaŭsia ŭ złačynstvie, što prypisali Šubiniu. U sakaviku 2007 hoda Šuczinia prysudzili da śmiarotnaha pakarańnia za heta zabojstva, ale jaho apielacyja razhladajecca da hetaha času.
Viarchoŭny narodny sud Kitaja adpraviŭ svoj novy vierdykt pazoŭniku i prakuroram, ciapier siamja Šubinia pavinna budzie atrymać kampiensacyju.
Paśla apraŭdalnaha rašeńnia suda baćka pakaranaha zajaviŭ u intervju CNN, što spraviadlivaść narešcie pieramahła: «Ja chacieŭ by skazać majmu synu: ty dobry čałaviek, ty nievinavaty». Telekanał adznačaje, što baćki Šubinia na praciahu mnohich hadoŭ zmahalisia za jaho apraŭdańnie, choć čynoŭniki zapałochvali ich, čynili ŭsialakija pieraškody (naprykład, uładkoŭvajučy zakrytyja pasiadžeńnia suda), a advakat siamiejstva adnojčy byŭ źbity.
Ciapier čytajuć
Anžalika Mielnikava paśla źniknieńnia nabyła dźvie kvatery ŭ Minsku65
Kamientary