25 hadoŭ tamu było abjaŭlena, što viadomy palityčny i vajskovy dziejač Polščy, kiraŭnik polskaj dziaržavy Jazep Piłsudski (1867 — 1935) źjaŭlajecca biełarusam.
Siensacyjnuju infarmacyju ŭ kastryčniku 1991 hoda paviedamiła BIEŁTA, jaje padchapili ŭsie tahačasnyja biełaruskija ŚMI. Adznačałasia, što ŭ Hałoŭnym archiŭnym upraŭleńni Respubliki Biełaruś «znojdzieny dakumient, jaki abviarhaje isnujučuju dumku, što viadomy palityčny dziejač Polščy 20-ch — 30-ch hadoŭ Juzaf Piłsudski byŭ palakam».
U pratakole dopytu 19-hadovaha revalucyjaniera 10 sakavika 1887 hoda paznačana, što Piłsudski skazaŭ: pa nacyjanalnaści jon biełarus.
Paźniej prafiesar Alaksandr Chackievič u svaim artykule «Juzef Piłsudski. Biełarus ci palak?» pracytavaŭ toj dakumient: «Zavuć mianie Osip Osipavič Piłsudski; ad rodu maju 19 hadoŭ; pachodžańnie i narodnaść dvaranin, biełarus…». Historyk dapuskaŭ, što rod Piłsudskich mieŭ «biełaruskuju katalickuju halinu». Sam Jazep, jaki naradziŭsia na Vilenščynie, vałodaŭ biełaruskaj movaj i vystupaŭ na joj pierad biełaruskaj aŭdytoryjaj.
U toj ža čas Chackievič adznačaŭ, što «nielha idealizavać pratakolny adkaz Piłsudskaha ŭ čas dopytu ab tym, što jon «biełarus», pakolki «iłžyvyja adkazy aryštavanych da revalucyi pa palityčnych matyvach revalucyjanieraŭ, z metaj źbić z pantałyku palicyju, dobra viadomy».
Ciapier čytajuć
U Homieli zakryli zabiahałaŭku pradprymalnika-łukašysta i źniščyli jaho płakat sa Stalinym1
Kamientary