Linkiavičus aburany, što na prezientacyju ŭ Minsk paklikali asobaŭ, padazravanych u vajennych złačynstvach u Vilni

Ministar zamiežnych spravaŭ Litvy Linas Linkiavičus u interviju Svabodzie prakamentavaŭ prezentacyju ŭ Miensku rasiejskaj knihi pra padziei ŭ Vilni 1991 hoda i admovu Biełarusi vydać litoŭskamu pravasudździu padazravanych u vajennych złačynstvach.

5 kastryčnika ŭ Domie Maskvy ŭ Miensku adbyłasia prezentacyi knihi žurnalistki rasiejskaj hazety «Komsomolskaja pravda» Haliny Sapožnikavaj.

Kniha maje nazvu «Kto koho priedał» i pryśviečanaja raspadu SSSR i ŭ pryvatnaści litoŭskim padziejam 1991 hodu, u tym liku — šturmu telecentru ŭ Vilni. Pavodle aŭtarki, «ciaham 25 hod ludziam naviazvali versiju padziejaŭ, jakaja nasamreč jość histaryčnaj falsyfikacyjaj».

U knizie Sapožnikava pravodzić ułasnaje daśledavańnie i prapanuje čytaču ŭłasnyja traktoŭki. Prykładam, praces prychodu Biełarusi da niezaležnaści jana nazyvaje «vakchanalijaj demakratyi».

Pavialičyć

Na prezentacyju byli zaprošanyja ŭdzielnik šturmu Vilenskaha telecentru eks-kamandzier hrupy KHB «Alfa» Michaił Hałavataŭ i były sakratar CK «kamunistyčnaj partyi Litvy na platformie KPSS» Alhimantas Naŭdžunas

Na siońniašni dzień abodvuch šukaje litoŭskaje pravasudździe. Hałavatava, Naŭdžunasa i jašče dziasiatki čałaviek padazrajuć u vajennych złačynstvach, ździejśnienych u studzieni 1991 hodu.

Pavialičyć

Dyplamatyčny skandał letam 2011 hodu vyklikaŭ vypadak, kali aŭstryjskija pamiežniki zatrymali Hałavatava dla dalejšaj ekstradycyi ŭ Litvu, što adpaviadaje eŭrapiejskim zakonam, adnak nieŭzabavie adpuścili ŭ Rasieju. Viadoma, što Naŭdžunas žyvie ŭ Padmaskoŭi i sioleta navat balatavaŭsia ŭ Dziaržaŭnuju dumu jak kandydat ad «Adzinaj Rasiei».

Fakt prezentacyi hetaj knižki ŭ Miensku z udziełam asobaŭ, jakich rasšukvaje Litva, Svabodzie prakamentavaŭ ministar zamiežnych spravaŭ Litvy Linas Linkiavičus:

— Ja nie prysutničaŭ na hetaj sustrečy, ale mahu sabie ŭjavić, što tam adbyvałasia. Vielmi sumna… Tyja histaryčnyja padziei źjaŭlajucca vajennym złačynstvam. Jość kala 70 padazravanych u spravie ab šturmie telecentru, balšynia žyvie ŭ Rasiei i Biełarusi. Zaviedzienyja adpaviednyja kryminalnyja spravy, jakija mohuć vieścisia i biaź ich udziełu.

— Ci źviartałasia apošnim časam aficyjnaja Vilnia da kiraŭnictva Biełarusi z prośbaju vydać hetych asobaŭ?

— Prakuratura Litvy nieadnarazova nakiroŭvała zapyty ab dapamozie ŭ praviadzieńni raśśledvańnia, adnak jany zastalisia biez adkazu. Zaŭždy isnujuć pravavyja metady dakazać svaju praŭdu. Na žal, zamiest hetaha pravodziacca takija mierapryjemstvy. Heta vielmi sumna dla nas.

— Na Vaš pohlad, čamu aficyjny Miensk nie idzie vam nasustrač u hetym pytańni i padazravanyja ŭ vajennych złačynstvach spakojna siabie tut adčuvajuć?

— Pra heta varta zapytać u aficyjnaha Miensku. Možna pryvodzić roznyja adhavorki, što dziaržava nie vydaje svaich hramadzian, isnuje nacyjanalnaje prava i hetak dalej. Ciapier my nia majem mahčymaści atrymać usiebakovuju infarmacyju pra trahičnyja padziei 1991 hodu, bo nia možam apytać usich udzielnikaŭ. Naturalna, heta nie dadaje ani abjektyŭnaści, ani pryjaznaści ŭ adnosiny pamiž dziaržavami.

— Jak Vy patłumačycie vyzvaleńnie Michaiła Hałavatava z Aŭstryi ŭ 2011 hodzie?

— Hałavataŭ sapraŭdy byŭ zatrymany ŭ mižnarodnym aeraporcie Vieny. Adpuścili jaho praź niadbajnaść pamiežnikaŭ i peŭnyja biurakratyčnyja prablemy. Tym nia mienš, my spadziajemsia, što sytuacyja nie paŭtorycca — siońnia dziejničaje mižnarodny order na zatrymańnie Hałavatava.

Padčas prezentacyi hienerał-major u adstaŭcy Alhimantas Naŭdžunas vykazaŭsia pra čałaviečyja achviary ŭ vyniku šturmu, što maŭlaŭ, «vajskoŭcy nia mieli bajavoj zbroi», a stralba pa ludziach «viałasia nieviadomymi z balkonaŭ prylehłych budynkaŭ».

«14 zabitych… Pamiataju, mnie patelefanavaŭ unačy hałoŭny lekar sa špitalu. Maŭlaŭ, pryjaždžaj i pahladzi, što narabili. Ale ja dakładna viedaju: trupy zvozili z usioj Litvy. Chtości pamior ad infarktu, čałavieka pryvieźli i pakłali na vulicy. Heta rabili tyja, chto ciapier vinavacić va ŭsim savieckuju ŭładu i «alfaŭcaŭ».

Spadar Linkiavičus adreahavaŭ na słovy Naŭdžunasa:

— Byccam by hienerał… Moža jon pierakvalifikaŭsia i piša fantastyčnyja ramany? Kaniešnie, možna skažać historyju, fakty, mahčyma, tak zručniej. Ale ŭ dadzienym vypadku hetak rabić nieprystojna z maralnaha punktu hledžańnia.

• 0
• 0
• 0
• 0
• 0
• 0
• 0
• 0