Sud pa administracyjnaj spravie Maryi Rymar, zatrymanaj u minskim aeraporcie za niepraŭdzivaje paviedamleńnie ab niebiaśpiecy, praciahniecca 4 žniŭnia
Sud pa administracyjnaj spravie hramadzianki Rasii Maryi Rymar, zatrymanaj u minskim aeraporcie za niepraŭdzivaje paviedamleńnie ab niebiaśpiecy, praciahniecca 4 žniŭnia. Pra heta Rymar paviedamiła BiełaPAN pa vynikach pasiadžeńnia suda Kastryčnickaha rajona Minska, jakoje adbyłosia 1 žniŭnia.
Nahadajem, juryst hramadskaha ŁHBT-ruchu «Aviers» z Samary Maryja Rymar, jakaja nakiroŭvałasia z Kijeva ŭ Maskvu tranzitam praź Biełaruś, była zatrymana ŭ minskim aeraporcie 7 lipienia. Paviedamlałasia, što jana niaŭdała pažartavała ŭ razmovie ź inśpiektaram słužby hramadskaj biaśpieki ŭ punkcie nadhladu pierad pasadkaj na rejs, zajaviŭšy, što ŭ jaje ŭ sumcy vybuchovaje rečyva.
U dačynieńni da Rymar była raspačata kryminalnaja sprava za niepraŭdzivaje paviedamleńnie ab niebiaśpiecy, a taksama administracyjnaja sprava za niepadparadkavańnie patrabavańniam supracoŭnikaŭ milicyi. Da 18 lipienia jaje ŭtrymlivali ŭ SIZA ŭ Minsku i Žodzinie, zatym vypuścili pad załoh pamieram 2,5 tys. denaminavanych rubloŭ. Na ŭvieś čas razboru pa kryminalnaj spravie, uklučajučy daśledčuju pravierku, śledstva i razhlad spravy, Rymar nie maje prava pakidać terytoryju Biełarusi.
Učora ŭ sud, pavodle słoŭ Rymar, źjavilisia abiedźvie asoby, čyje apytańni znachodziacca ŭ materyjałach administracyjnaj spravy: supracoŭnica słužby pieradpalotnaha nadhladu aeraporta i supracoŭnik AUS, «ź liku milicyjanieraŭ, jakija ŭdzielničali ŭ zatrymańni i prymianiali siłu pry dastaŭleńni ŭ dziažurnuju čaść». «Supracoŭnica siektara nadhladu taksama paviedamiła sudu pra toje, što stała śviedkaj kanfiskacyi ŭ mianie pašparta z prymianieńniem hrubaj siły supracoŭnikam AUS, jaki znachodziŭsia pry vykanańni słužbovych abaviazkaŭ. Hety incydent adbyŭsia ŭ jaje prysutnaści kala 21.00 viečara 7 lipienia, kali ja była zaprošana ŭ adździaleńnie milicyi dla apytańnia», — paviedamiła aktyvistka.
Akramia taho, u sudzie byŭ prahledžany zapis kamier nazirańnia, dałučany da spravy. Sudom vyrašana apytać u jakaści śviedak inšych asob, jakija ŭdzielničali ŭ afarmleńni administracyjnaha pratakoła.
Adkazvajučy na pytańnie ab chodzie rasśledavańnia raspačataj u dačynieńni da jaje kryminalnaj spravy, Rymar paviedamiła: «Padčas majho apošniaha naviedvańnia SK mnie paviedamili, što dla zakančeńnia papiaredniaha śledstva nie chapaje tolki adnaho dakumienta. Heta daviedka ź psichanieŭrałahičnaha dyspansiera pa maim miescy žycharstva ab tym, što ja nie znachodžusia ŭ ich na ŭliku. Ciapier śledstvu dakładna viadoma, što ja nie znachodžusia na psichijatryčnym uliku».
Raniej u intervju BiełaPAN Rymar paviedamiła, što infarmacyja ab tratyle ŭ sumcy nie była žartam. Pavodle jaje słoŭ, heta było «sprobaj paźbiehnuć źnievažalnaha hodnaść abychodžańnia» pry asabistym nadhladzie. Nie zhodna Rymar i z tym, što jana nibyta nie padparadkavałasia zakonnamu patrabavańniu supracoŭnikaŭ milicyi. «U administracyjnaj spravie ja taksama nie baču składu. U faktury spravy napisana, što ja admaŭlałasia pradjavić pašpart i prajści dla dačy tłumačeńniaŭ. Ale ja pradjaŭlała pašpart tam, nieadnarazova, i ja spadziajusia, što heta budzie zafiksavana. Bolš za toje, ja supraciŭlałasia sprobie zabrać u mianie pašpart siłaj, što supracoŭniki milicyi sprabavali zrabić šmat razoŭ. I ŭ vyniku jon z prymianieńniem hrubaj siły byŭ kanfiskavany — paśla dnia ździekaŭ: bieź ježy, praktyčna biez vady», — zajaviła juryst.
Kamientary