Śviatłana Kalinkina: Chto stanie biełaruskimi Jaravoj i Mizulinaj?

Palityki pavinny zdabyvać maksimum z najaŭnaj situacyi. Kali vybary ŭ Biełarusi — heta paniaćcie ŭmoŭnaje, i trapić u parłamient možna, tolki damoviŭšysia z uładaj, to treba damaŭlacca. Heta adziny vychad. 

Jak by tam ni było, ale try-piać-siem apazycyjnych deputataŭ u Pałacie pradstaŭnikoŭ — heta ŭsio roŭna lepš, čym ničoha. A ŭžo jakim čynam jany tudy trapiać — nie hetak važna. Z čahości treba pačynać, i ciapierašniaja vybarčaja kampanija dla apazycyi — heta šaniec pačać. Zrazumieła, što nikoha z radykalnych, zaśviečanych apazicyjanieraŭ u deputaty nie prapuściać. Ale choć niechta budzie. Choć niechta — heta lepš, čym nikoha. Treba być realistam …

«Vy nie zhodnyja?» — paśla takich pramoŭ zvyčajna pytajucca surazmoŭcy, tamu što maju reakcyju na takija razvahi, jak praviła, možna pračytać pa tvary.

Tak, ja nie zhodnaja.

Bolš za toje, ja nie razumieju, čamu razvahi na hetuju temu viaducca jak tearetyčnyja. I čamu prychilniki idei patrapleńnia pradstaŭnikoŭ biełaruskaj apazicyi ŭ parłamient na ŭmovach dziejučaj ułady, u vyniku kułuarnych pieramovaŭ i damoŭlenaściaŭ, ličacca realistami, pradstaŭnikami reał-palityk, a praciŭniki - idealistami. Na moj pohlad, usio z dakładnaściu da naadvarot. Tamu što pytańnie hetaje treba abmiarkoŭvać nie ŭ teoryi, a na kankretnych prykładach.

Dastatkova šmat havaryłasia pra toje, što na Biełarusi byli aprabavanyja mnohija palityčnyja technałohii, jakija potym paśpiachova ŭžyvalisia ŭ Rasii. Ale ciapier naša ŭłada navažyłasia realizavać rasijski dośvied.

Dziaržaŭnaja duma Rasii z padačy Uładzimira Poźniera ŭ narodzie nazyvajecca «dziaržaŭnaj duraj». I ŭsio ž davajcie my nie budziem durniami, davajcie na jaje pilniej pahladzim.

Samyja adyjoznyja deputaty Dziarždumy, samyja zaŭziatyja, pałkija, apantanyja — heta jakraz byłyja apazicyjaniery. Abo tyja, chto pieršapačatkova pazicyjanavaŭ siabie jak hulca, nie zaležnaha ad partyi ŭłady.

Iryna Jaravaja — «jabłačnica», Alena Mizulina — «jabłačnica», Pavieł Krašeńnikaŭ — SPS, śmieły žurnalist-daśledčyk z demakratyčnaha da dziorzkaści «Maskoŭskaha kamsamolca» Alaksandr Chinštejn, žurnalist-mižnarodnik, jaki supracoŭničaŭ z samymi demakratyčnymi amierykanskimi fondami Alaksandr Puškoŭ… I śpis možna praciahnuć.

Ci heta nie nahladny vynik patrapleńnia ŭ parłamient «miakkich apazicyjanieraŭ» nie šlacham sumlennych vybaraŭ, a na ŭmovach ułady?

Adzin raz pryniaŭšy ŭmovy brudnaj hulni, nieafity potym prosta vymušanyja dakazvać svaju prychilnaść hetym praviłam. Svaje siarod čužych, čužyja siarod svaich, jany ŭ vyniku stanoviacca śviaciejšyja za Papu Rymskaha — samymi-samymi, biezzapavietna addanymi, tamu što šlachu nazad u ich niama.

Kampanija «Havary praŭdu!» vyznačyłasia sa svaimi kandydatami na prezydenckich vybarach. U publičnych zajavach patencyjnyja kandydaty «HP» vyhladajuć adekvatnymi i ŭ bolšaści svajoj kažuć, što ŭ sumlennyja vybary, u sumlenny padlik hałasoŭ nie vierać. Tady ŭ što vierać? U damoŭlenaści?..

Ale heta značyć, što mienavita siarod ich siońnia znachodzicca svaje Jaravaja, Mizulina, Puškoŭ… Ci razumiejuć jany heta? Ci na samaj spravie źjaŭlajucca idealistami, jakich zahaniajuć u pastku.

Ja — nie pra śviadomych piarevaratniaŭ. Ja — pra tych naiŭnych, chto vieryć, što siońnia apazicyjanieram treba «prykinucca ryźziom», dakazać svaju łajalnaść uładzie, patrapić u parłamient, a ŭžo potym, majučy mandat, možna budzie razharnuć sapraŭdnuju «padryŭnuju pracu». (U «Havary praŭdu» amal adkryta ahučvajuć taki padychod, tamu na ich i zrobleny akcent, choć prychilnikaŭ takoj taktyki niamała ŭ samych roznych arhanizacyjach).

Ale takoha pry adsutnaści sumlennych vybaraŭ i sumlennaha padliku hałasoŭ nie budzie. A budzie tak, jak ź Mizulinaj. Na žal, heta i jość reał-palityk …

• 0
• 0
• 0
• 0
• 0
• 0
• 0
• 0