Nacyjanalnaja zbornaja Biełarusi pa chakiei ŭčora na čempijanacie śvietu ŭ kanadzkim Kvebeku praviała adzin z najbolš dramatyčnych matčaŭ.
Užo paśla pieršaha peryjadu našy chłopcy niečakana vyjhravali 2:0, dziakujučy šajbam Michalova i Dudzika. Razam z tym, rasiejcy niaspynna atakavali našu bramu, ale kuraž złaviŭ Vital Koval. Samaja prablemnaja pazycyja našaj kamandy, jak dumałasia pierad čempijanatam, ŭčora akazałasia ci nie najbolš tryvałaj. Koval vyratoŭvaŭ u niekalkich absalutna fantastyčnych sytuacyjach.
Strymlivać uvieś matč mocny rasiejski ruchavik było vielmi ciažka. Jašče ŭ druhim peryjadzie Maksim Afinahienaŭ adyhraŭ adnu šajbu, a ŭ trecim – Aviečkin i toj samy Afinahienaŭ vyvieli Rasieju napierad – 3:2. U momant, kali ŭ našu bramu zakidvałasia treciaja šajba, telekamery vychapili Kurta Frejzera, jaki schapiŭsia za hałavu. Zdajecca, što navat trener nia vieryŭ, što jahonaja kamanda zmoža adyhracca. Ale za dźvie z pałovaj chviliny da finalnaj syreny Alaksiej Uharaŭ vyraŭniaŭ lik.
U overtajmie šancy na pieramohu byli i ŭ tych, i ŭ tych. Naprykancy dadatkovaha času zusim nie abaviazkovaje vydaleńnie atrymaŭ Andrej Kaścicyn, ale ŭsio adno vytrymali.
Pačałasia seryja bulitaŭ – chakiejnaja latareja. Peŭna, Vital Koval vyčarpaŭ limit fartuny jašče ŭ asnoŭny čas. Jon tak i nia ŭziaŭ bulity Maziakina i Marozava. U nas zabić zmoh tolki Mialeška, a voś Siarhiej Kaścicyn i Ŭharaŭ rasiejskaha bramnika Birukova nie pierajhrali – 3:4.
Paražeńnie ad rasiejcaŭ jašče pakinuła biełarusam pryvidnyja šancy na traplańnie ŭ čverćfinał. Dla hetaha treba siońnia pieramahać čechaŭ, a praz dva dni datčan.
Kamientary