Pasoł Litvy ŭ Biełarusi Evałdas Ihnatavičus admoviŭsia ad zaprašeńnia Ministerstva enierhietyki Biełarusi naviedać budaŭničuju placoŭku Biełaruskaj atamnaj stancyi, kab asabista pierakanacca ŭ biaśpiečnym praviadzieńni rabot, paviedamlaje charter97 sa spasyłkaj na ahienctva BNS.
Dypłamat zajaviŭ, što biaśpieku pavinny aceńvać ekśpierty. «Ja admoviŭsia ad prapanovy, bo, pa-mojmu, hetym pavinny zajmacca ekśpierty», — paviedamiŭ Ihnatavičus.
Jon padkreśliŭ, što ažyćciaŭleńnie patrabavańniaŭ pa jadziernaj biaśpiecy pavinna pravodzić mižnarodnaje ahienctva pa atamnaj enierhii MAHATE.
Nahadajem, 5 maja Ministerstva zamiežnych spraŭ Litvy ŭručyła pasłu Biełarusi Alaksandru Karalu notu z-za «mahčymaha incydentu na raźmieščanaj za 50 km ad Vilniusa Astravieckaj atamnaj elektrastancyi». «My adrazu ž, jak tolki atrymali hetuju infarmacyju ź niefarmalnych krynic, stali prymać miery, a siońnia ŭ ministerstva byŭ vyklikany pasoł Biełarusi, jakomu była ŭručanaja nota z patrabavańniem rastłumačeńniaŭ hetaha incydentu abo avaryi, ab inšych mahčymych zdareńniach, jakija byli da hetaha, bo pra heta pišuć biełaruskija ŚMI», — zajaviŭ žurnalistam u Vilniusie ministr zamiežnych spraŭ krainy Linas Linkiavičus.
3 maja litoŭskaje źniešniepalityčnaje viedamstva vystupiła z zajavaj, u jakoj zaklikała Biełaruś «jak maha chutčej vykanać patrabavańni MAHATE pa jadziernaj biaśpiecy».
Aficyjny Vilnius nieadnarazova padkreślivaŭ, što Litva nie maje namieru kuplać elektraenierhiju ź Biełaruskaj AES. Z punkta hledžańnia litoŭskaha boku, budaŭnictva stancyi parušaje patrabavańni Kanviencyi ab acency ŭździejańnia na navakolnaje asiarodździe ŭ transhraničnym kantekście (Kanviencyja Espa), jakaja praduhledžvaje acenku ŭździejańnia abjektaŭ na navakolnaje asiarodździe nie tolki ŭnutry krainy, ale i ŭ sumiežnych krainach.
Biełaruskaja AES uzvodzicca ŭ Hrodzienskaj vobłaści, prykładna za 20 km ad Astraŭca, pavodle prajekta rasijskaj kampanii «Atamstrojekspart». Hienieralnym prajekciroŭščykam i padradčykam vystupaje rasijskaja kampanija AAT «NIAEP» — ZAT «ASE». Stancyja budzie składacca z dvuch enierhabłokaŭ sumarnaj mahutnaściu da 2.400 MVt. Uvod u ekspłuatacyju pieršaha błoka zapłanavany da 2018 hoda, druhoha — da lipienia 2020-ha.
Kamientary