Uber abnaviŭ karystalnickaje pahadnieńnie. U novaj viersii prapisana, što Uber nie źjaŭlajecca transpartnaj kampanijaj i nie niasie nijakaj adkaznaści za jakaść pasłuh i biaśpieku pasažyraŭ
Najbujniejšy ŭ śviecie servis pa vykliku taksi Uber siońnia abnaviŭ karystalnickaje pahadnieńnie. U im źjavilisia punkty i farmuloŭki, jakich nie było ŭ papiarednich viersijach dakumienta.
Novaja viersija karystalnickaj damovy — heta hłabalnaje abnaŭleńnie, patłumačyła RBK pradstaŭnik Uber Jaŭhienija Šypava. Pavodle jaje słoŭ, u kampanii źjavilisia novyja servisy - naprykład, UberEATS (dastaŭka ježy) i UberRUSH (dastaŭka tavaraŭ z mahazinaŭ), tamu Uber było nieabchodna «prapisać umovy adkaznaści» pierad karystalnikami. «Pryncypovych źmienaŭ u praviłach niama», — nastojvaje Šypava.
U abnoŭlenym pahadnieńni Uber vyrazna prapisaŭ, što nie źjaŭlajecca transpartnaj kampanijaj i nie niasie za pieravozki nijakaj adkaznaści, tłumačyć juryst BGP Litigation Anastasija Jeŭtušenka. U novaj viersii źjaviŭsia, u pryvatnaści, asobny raździeł, u jakoj prapisany pravavyja ahavorki i abmiežavańnie adkaznaści kampanii.
Uber akazvaje pasłuhi pa pryncypie «jak jość» i «na ŭmovach najaŭnaści», kampanija nie daje harantyj «adnosna nadziejnaści, svoječasovaści, jakaści, prydatnaści abo dastupnaści pasłuh abo lubych pasłuh abo tavaraŭ», skazana ŭ abnoŭlenym pahadnieńni. Uber zdymaje ź siabie adkaznaść za «uskosnyja, vypadkovyja, niepradbačanyja, faktyčnyja, štrafnyja abo paźniejšyja straty», za «zhublenyja dadzienyja, cialesnyja paškodžańni abo materyjalnuju škodu», za «lubyja straty, abaviazacielstvy abo škodu», navat u vypadku, kali kampanija była papiaredžana ab mahčymaści takich strat, skazana ŭ punkcie «Abmiežavańnie adkaznaści».
Padpisvajučy pahadnieńnie, karystalnik pryznaje, što inšyja pastaŭščyki transpartnych pasłuh (…) mohuć «nie mieć prafiesijnych licenzij abo dazvołaŭ». «Vy [karystalniki] zhadžajeciesia, što ŭ kampanii Uber niama nijakich abaviazacielstvaŭ i adkaznaści pierad vami [karystalnikami] ŭ dačynieńni pieravozak, pradastaŭleńnia tavaraŭ abo łahistyčnych pasłuh inšymi pastaŭščykami», — havorycca ŭ novaj viersii dakumienta. U dakumiencie skazana, što ni pry jakich abstavinach poŭnaja adkaznaść Uber u adnosinach da karystalnikaŭ «nie budzie pieravyšać €500 pa ŭsich stratach, škodzie abo padstavach dla pazovu».
Kamientary