U iranskaj stalicy Tehieranie natoŭp pratestoŭcaŭ suprać pakarańnia saŭdaŭskimi ŭładami viadomaha šyickaha prapaviednika Nimra Bakr al-Nimra prarvałasia na terytoryju pasolstva Saudaŭskaj Aravii i zładziŭ pahrom, paviedamlajuć vidavočcy.
Mitynhoŭcy kidali ŭ budynak dypmisii kamiani i «kaktejli Mołatava», u vyniku čaho častka budynka zaharełasia. Paviedamlajecca, što atrady palicyi zdoleli paciaśnić natoŭp.
3 studzienia stała viadoma, što pa spravie ab napadzie na pasolstva ŭ Tehieranie aryštavanyja 40 čałaviek. Asoby ŭsich zatrymanych vyśvietlenyja. Prakuror Tehierana Abas Džafar Dałatabadzi zajaviŭ, što mohuć być i inšyja aryšty.
Abureńnie irancaŭ vyklikała pakarańnie papularnaha šyickaha bahasłova Nimra Bakr al-Nimra ŭ Saudaŭskaj Aravii, jakoha abvinavacili ŭ datyčnaści da terarystyčnaj dziejnaści. Razam ź im u subotu byli pakaranyja śmierciu jašče 46 čałaviek.
Prapaviednik, jakoha čaściej za ŭsio nazyvali prosta Šejch Nimr, atrymaŭ šyrokuju viadomaść paśla 2011 hoda, kali padtrymaŭ masavyja antyŭradavyja vystupy šyitaŭ, jakija składajuć 10-15% nasielnictva karaleŭstva. U 2012 hodzie jaho aryštavali. Na sudzie jon nie admaŭlaŭ vyłučanych suprać jaho palityčnych abvinavačvańniaŭ, adnak padkreślivaŭ, što nikoli nie nasiŭ zbroi i nie zaklikaŭ da hvałtu.
Pakolki raźmieščany pobač Iran źjaŭlajecca pieravažna šyickaj krainaj u supraćlehłaść sunickaj Saudaŭskaj Aravii, a ŭ adnosinach pamiž susiedziami na praciahu dziesiacihodździaŭ prysutničaje napružanaść (a miescami adkrytaja varožaść), to ŭ Iranie za losam Šejcha Nimra sačyli z padvojenaj uvahaj.
Adrazu paśla viestki ab pakarańni bahasłova ministerstva zamiežnych spraŭ Irana vyklikała saudaŭskaha pasła, zajaviŭšy jamu notu pratestu. U svaju čarhu, Er-Ryjad vyklikaŭ iranskaha pasła i zajaviŭ, što reakcyja Irana na pakarańnie pradstaŭlaje saboj «hrubaje ŭmiašalnictva» ŭ spravy karaleŭstva.
Dziejańni Er-Ryjada vyklikali krytyku nie tolki ŭ Iranie, ale i z boku daŭniaha sajuźnika hetaj blizkaŭschodniaj naftazdabyvajučaj manarchii — Złučanych Štataŭ.
Dziarždepartament ZŠA ŭ subotu vykazaŭ škadavańnie ŭ suviazi z pakarańniem śmierciu Nimra Bakr al-Nimra: pa słovach pradstaŭnikoŭ amierykanskaha źniešniepalityčnaha viedamstva, dziejańni Er-Ryjada mohuć abvastryć stanovišča na Blizkim Uschodzie.
Vašynhton zaklikaŭ saudaŭskija ŭłady pavažać mierkavańnie apazicyi i krytyku ŭ svoj adras.
Kamientary