Doktar-terapieŭt haradskoj palikliniki № 6 Hrodna na vykliku prasiła chvoraha padpisacca za vyłučeńnie Alaksandra Łukašenki ŭ jakaści kandydata na prezidenckuju pasadu. Vypadak adbyŭsia 27 lipienia, skazała BiełaPAN žycharka Hrodna, jakaja paprasiła nie nazyvać jaje imia.
Pavodle jaje słoŭ, ranicaj u minuły paniadziełak jana vyklikała na dom terapieŭta dla svajho chvoraha 27-hadovaha syna. Doktarka, jakaja zamianiała ŭčastkovaha terapieŭta, pryjšła prykładna ŭ 20.30, jaje sustreŭ sam chvory, bo maci vyjšła ŭ dziažurnuju apteku.
«U syna była vysokaja tempieratura — amal 40 hradusaŭ, tym nie mienš jana [doktarka] paličyła mahčymym paprasić u jaho podpis za Łukašenku, — skazała žycharka Hrodna. — Vy ŭjaŭlajecie čałavieka, u jakoha amal 40 hradusaŭ tempieratura? Tym bolš, mahčyma, u jaho zusim inšaja pazicyja ŭ žyćci. Jon naohuł nie pamiataje, padpisaŭ jon ci nie, jon hetym mučycca».
Paśla, pavodle jaje słoŭ, doktarka «na vykliki nie źjaŭlałasia, mabyć, tamu, što była zaniataja zboram podpisaŭ». 29 lipienia paśla zvanka ŭ «chutkuju dapamohu» maładoha čałavieka špitalizavali ŭ infiekcyjnuju balnicu z dyjahnazam «hnojnaja anhina». «Doktaru, mabyć, nie było času ni ŭ aŭtorak, ni ranicaj u sieradu. Jana źjaviłasia tolki pozna viečaram [u sieradu], pakinuła zapisku ŭ dźviarach, ale my ŭ toj čas byli ŭ balnicy», — adznačyła žycharka Hrodna.
Žančyna ličyć heta «aburalnym vypadkam», kažučy, što miedycyna pavinna być «pa-za palitykaj». Heta, pavodle jaje słoŭ, «nieetyčna, niapravilna i nasupierak usim normam čałaviečaj marali».
Pra zdareńnie žycharka Hrodna 3 žniŭnia raskazała hałoŭnamu doktaru palikliniki № 6 Natalli Jahorčanka i paprasiła «prybrać daktaroŭ» z palityčnaha pracesu.
U svaju čarhu hałoŭny doktar palikliniki ŭ hutarcy ź BiełaPAN paviedamiła, što ŭ žančyny paprasili prabačeńnia. Jana paćvierdziła, što taksama ličyć takuju situacyju niapravilnaj. «Ja paprasiła prabačeńnia i skazała, što nadalej takoha nie paŭtorycca», — skazała Jahorčanka.
Pavodle słoŭ kiraŭnika palikliniki, siarod daktaroŭ i miedsiaścior ustanovy jość členy inicyjatyŭnaj hrupy Alaksandra Łukašenki, adnak zajmacca zboram podpisaŭ jany mohuć tolki ŭ niepracoŭny čas.
Z terapieŭtam, jakaja paprasiła chvoraha maładoha čałavieka paŭdzielničać u palityčnym pracesie, jak adznačyła Jahorčanka, «budzie praviedzienaja hutarka» ŭ tym liku «nakont etyki i deantałohii». Akramia maralnaha aśpiektu, pavodle słoŭ hałoŭnaha doktara palikliniki, taksama ŭźnikli pytańni «pa taktycy lačeńnia pacyjenta», jaki paśla apynuŭsia na balničnym łožku.
Kamientary