ZAT «Płaciežnaja sistema BIEŁKART» źviartaje ŭvahu trymalnikaŭ płaciežnych kartak ź mižnarodnym statusam BIEŁKART-Maestro na źjaŭleńnie novaha sposabu machlarstva z kartkami — šyminh. Pra heta paviedamili ŭ adździele pa suviaziach z hramadskaściu pradpryjemstva.
«Pakul što šyminh da Biełarusi nie dabraŭsia, tamu niepakoicca treba tolki ŭładalnikam kartak ź mižnarodnym statusam, jakija karystajucca za miažoj bankamatami. U Biełarusi ž bolšuju niebiaśpieku pa-raniejšamu ŭjaŭlaje skiminh», — adznačyli śpiecyjalisty.
Hałoŭnaje adroźnieńnie šyminhu ad skiminhu — heta niemahčymaść raspaznać pryładu pieršaha prostym vokam. Jana ŭjaŭlaje saboj tonkuju płatu, jakaja ŭstaŭlajecca ŭ kartrydar i sčytvaje z bankaŭskaj kartki infarmacyju.
Skimier vyhladaje jak nakładka, unutry jakoj znachodzicca pryłada, jakaja sčytvaje infarmacyju z mahnitnaj pałasy płaciežnaj kartki. Dalej sčytanaja infarmacyja machlarami vykarystoŭvajecca dla vyrabu dublikata kartki. Zvyčajna skimiery macujucca na bankamat. Kab daviedacca PIN-kod, machlary vykarystoŭvajuć skrytyja videakamiery i nakładnyja kłavijatury.
«Treba razumieć, što i skimier raspaznać nialohka. Jany byvajuć roznyja, i jakaść vykanańnia darahich madelej mała čym adroźnivajecca ad aryhinała. Trymalniki bankaŭskich kartak pavinny pamiatać: tolki pilnaść i ŭvažlivaść dapamohuć paźbiehnuć kradziažoŭ hrošaj z rachunku», — kanstatavali śpiecyjalisty.
U adździele pa suviaziach z hramadskaściu parekamiendavali vykarystoŭvać bankamaty, jakija znachodziacca ŭ handlovym centry, adździaleńni banka abo ŭ hramadskim miescy, jakoje dobra prahladajecca. Akramia taho, nie treba pieradavać svoj PIN-kod, davać karystacca kartkaj. Taksama nieabchodna padklučyć pasłuhu SMS-paviedamleńnie, jakaja daść mahčymaść być u kursie niesankcyjanavanaha śpisańnia srodkaŭ z rachunku.
Pavodle danych pradpryjemstva, u Biełarusi ŭvieś kartačny partfiel aceńvajecca ŭ 12,5 młn kartak, ź ich 5,2 młn prypadaje na BIEŁKART.
Kamientary