U Minsku vyznačanyja piać vulic, na jakich źjavicca pałasa dla hramadskaha transpartu

U Minsku vyznačanyja piać vulic, na jakich budzie vydzielena pałasa dla hramadskaha transpartu, paviedamiŭ na pres-kanfierencyi 1 lipienia ŭ Minsku načalnik adździeła arhanizacyi pasažyrskich pieravozak dziaržaŭnaj ustanovy «Staličny transpart i suviaź» Alaksandr Kapciuch. 

Pavodle jaho słoŭ, horadabudaŭničy prajekt užo vykanany i prajšoŭ usie ŭzhadnieńni. «Takim čynam, u Minsku vyznačany piać učastkaŭ vulična-darožnaj sietki, na jakich u pieršačarhovym paradku nieabchodna vydzialeńnie adasoblenych pałos dla ruchu hramadskaha transpartu (aŭtobusaŭ, tralejbusaŭ, maršrutnych i lehkavych taksi)», — paviedamiŭ Kapciuch. 

Heta buduć vulicy Kuncaŭščyna, Łabanka, Niamiha, Babrujskaja, praśpiekt Niezaležnaści ŭ rajonie Uručča i vulica Cimirazieva. «Vydzieleny piłotny prajekt u rajonie vulic Kuncaŭščyna i Łabanka, pa jakim pravodzicca pieradprajektnaja padrychtoŭka. Jana pakazała mahčymaść vydzialeńnia hetaj pałasy biez kanstruktyŭnych źmianieńniaŭ, tolki pry dapamozie raźmietki i znakaŭ, — adznačyŭ pradstaŭnik ustanovy. — Krychu novaje rašeńnie — vyniasieńnie prypynačnych punktaŭ na prajeznuju častku. Takim čynam vyrašajecca składanaja prablema z pryparkavanymi aŭtamabilami. U hetym vypadku arhanizoŭvajecca ruch hramadskaha transpartu pa druhoj pałasie biez zajezdu ŭ kišeń dla prypynkaŭ. Jość prapanova pałasu dla hramadskaha transpartu vydzielić peŭnym jarkim koleram». 

«Adzinaja pakul zahvozdka — u vyznačeńni zamoŭca na hetyja raboty», — adznačyŭ čynoŭnik. «Va ŭsich pradpryjemstvach horada na hety hod prajekty źviarstanyja i vydzielenyja srodki. Na hety prajekt vyłučeńnie srodkaŭ mahčymaje tolki šlacham valavoha rašeńnia kiraŭnictva horada», — paviedamiŭ Kapciuch. Pavodle jaho mierkavańnia, zakazčykam moža vystupić UDAI HUUS Minharvykankama ci ŭnitarnaje pradpryjemstva «Harramaŭtadar». 

Kapciuch paviedamiŭ, što abjom rabot i terminy niaznačnyja. «U ideale ich možna vykanać da vosieni. Realizacyja hetaha prajekta pakaža jaho nieabchodnaść i metazhodnaść», — ličyć načalnik adździeła. 

U parłamiencie, pavodle jaho słoŭ, prapracoŭvajecca pytańnie ab ŭkaranieńni sistemy videafiksacyi parušeńniaŭ praviłaŭ darožnaha ruchu. «Kali heta pytańnie vyrašycca, to heta moža vyrašyć prablemu z parkoŭkami kala prypynkaŭ i vydzielenymi pałosami. Vadziciel budzie razumieć, što za jaho parušeńniami sočać, pałasa pačnie pracavać. Pieravahu atrymajuć pasažyry hramadskaha transpartu. A heta budzie stymulavać aŭtaŭładalnikaŭ pierasadžvacca ŭ hramadski transpart», — adznačyŭ śpiecyjalist. 

Jon taksama paviedamiŭ, što, pavodle raźlikaŭ ekśpiertaŭ, pry ŭkaranieńni vydzielenaj pałasy siaredniaja chutkaść hramadskaha transpartu pavialičycca na 10 km/hadz (siońnia jana składaje 16,2 km/hadz).

• 0
• 0
• 0
• 0
• 0
• 0
• 0
• 0