Biełaruski hitaryst Pavieł Kuchta staŭ uładalnikam pieršaj premii prestyžnaha muzyčnaha spabornictva - mižnarodnaha konkursu hitarystaŭ u horadzie Chajnśbierhu (Hiermanija), paviedamiŭ kiraŭnik kłuba hitarystaŭ Biełarusi Aleh Kapiankoŭ.
U konkursie, jaki prachodziŭ z 12 pa 16 maja, pryniali ŭdzieł bolš jak 40 hitarystaŭ z 28 krain śvietu. Mižnarodnaje žury pradstaŭlali suśvietna viadomyja hitarysty Anijeła Deziderya (Italija), Alfred Ajkcholt (Hiermanija), Aleksis Muzarakis (Hrecyja), Tomaš Zavirucha (Polšča), Alaksiej Biełavusaŭ (Izrail) i inš.
Pavodle słoŭ Paŭła, raniej jon užo dvojčy ŭdzielničaŭ u hetym konkursie i byŭ u jaho finale, ale ŭźniacca na vyšejšuju prystupku pjedestała jamu ŭdałosia tolki ciapier.
«Try asnoŭnyja etapy konkursu prajšli ŭ žorstkaj kankurentnaj baraćbie, — adznačyŭ jon. — Tut niedastatkova było pakazać tolki vysokuju techniku i virtuoznaść vałodańnia hitaraj, uličvałasia litaralna ŭsio: muzykalnaść, emacyjanalnaść, umieńnie trymacca na scenie. Ja vykonvaŭ, zrazumieła, toje, što ŭ mianie bolš za ŭsio atrymlivajecca, u tym liku novuju sanatu suśvietna viadomaha kubinskaha kampazitara Lea Braŭera. Jaje ihrajuć u śviecie tolki dva ci try hitarysty».
Pieramoha ŭ hetym prestyžnym konkursie daje prava Paŭłu Kuchtu na sieryju solnych kancertaŭ u Jeŭropie i inšych krainach śvietu, a taksama zapis ułasnaha kampakt-dyska na adnoj ź viadomych kanadskich studyj hukazapisu — prajezd i zapis apłačvaje fond konkursu. Pieršy solny kancert paśla pośpiechu ŭ Chajnśbierhu ŭ Paŭła Kuchty adbudziecca 21 maja ŭ Mahilovie, a 22 maja jaho čakajuć na hitarnym fiestyvali ŭ Bransku (Rasija).
Pavieł Kuchta — adzin z samych jarkich pradstaŭnikoŭ sučasnaj biełaruskaj kłasičnaj hitarnaj škoły. Jon rehularna pradstaŭlaje Biełaruś na roznych muzyčnych konkursach i fiestyvalach, jakija prachodziać u roznych kutkach płaniety.
Ciapier čytajuć
Capkała i Bałkuniec atakavali litoŭskaha palityka, jaki dapamahaŭ biełarusam paśla 2020‑ha i spryčyniŭsia da spravy, jakuju zavioŭ prakuror u Haazie4949
Kamientary