Pošta TUT.BY piarojdzie z Google da «Jandeksa»
Biełaruski partał TUT.BY paviedamiŭ ab pieranosie servisu elektronnaj pošty na servis «Jandeksa». Niekatorym karystalnikam pryjdziecca pieranaładzić prahramy na kampjutarach i telefonach.
Pieranos pošty na «Jandeks» adbudziecca ŭ suviazi z zakryćciom kampanijaj Google usich servisaŭ elektronnaj pošty, što nie znachodziacca na damienie gmail.com. Da takich adnosiłasia i pošta TUT.BY. Partał damoviŭsia z rasijskaj kampanijaj «Jandeks» ab pieranosie pošty na ich servis.
Pierachod adbudziecca nie paźniej za 15 krasavika.
Budzie pieraniesiena bolš za 2 miljony akaŭntaŭ. Adrasy pošty (naprykład, [email protected]) nie źmieniacca. Zachavajucca ŭsie papki i archiŭ paviedamleńniaŭ. Źmienicca dyzajn staronki mail.tut.by. Taksama da akaŭntu @tut.by nielha budzie pryviazać Android-smartfony i akaŭnty na servisach Google.
Tym, chto vykarystoŭvaŭ paštovyja prahramy na kampjutarach ci smartfonach, pryviazvaŭ da akaŭntu TUT.BY smartfon na Android albo servisy Google (Kalandar, Google Drive, Youtube i h.d.) treba ciaham bližejšych 10 dzion pieranieści źviestki i źmianić nałady.
- Kab pieranaładzić paštovyja prahramy (Outlook, The Bat, pošta na smartfonach i inšyja), kali jany pierastanuć pracavać, skarystajciesia hetaj instrukcyjaj.
- Kab pieranieści źviestki z akaŭntu @tut.by na @gmail.com, skarystajciesia hetaj instrukcyjaj.
- Kab pieranaładzić smartfon na Android, treba dadać novy ŭlikovy zapis Google (na pošcie z adrasam @gmail.com), naładzić sinchranizacyju i reziervovaje kapijavańnie na novy zapis. Stary zapis na @tut.by zatym možna vydalać ź sistemy.
- Kali vy rabili niejkija pakupki ŭ Google Play, jany zastanucca aktyŭnymi na smartfonie ci płanšecie, ale ich niemahčyma budzie pieranieści na inšyja smartfony i płanšeta.
***
Pieršapačatkovaja ideja TUT.BY była ŭ stvareńni paštovaha servisu dla biełarusaŭ nakštałt rasijskaha Mail.ru, ale da adkryćcia ŭvosień 2000 hoda transfarmavałasia ŭ partał nakštałt papularnaha tady Yahoo. U 2007 hodzie biełaruski paet Andrej Chadanovič pradstaviŭ knihu vieršaŭ «Sto li100ŭ na TUT.BY». U 2009 hodzie pošta TUT.BY była pieraviedzienaja z ułasnaha servisu na servis Google.
Kamientary