Rasijskija śledčyja zatrymali čatyroch supracoŭnikaŭ aeraporta Unukava pa spravie ab krušeńni samalota Falcon-50, na borcie jakoha znachodziŭsia kiraŭnik rady dyrektaraŭ najbujniejšaj francuzskaj naftavaj kampanii Total Krystof de Maržery.
Camalot raźbiŭsia ŭ noč na aŭtorak u aeraporcie Unukava paśla sutyknieńnia na ŭźlotnaj pałasie sa śniehaŭboračnaj mašynaj, kiroŭca jakoj, pa dadzienych śledstva, moh być pjany.
Advakat kiroŭcy i jon sam admaŭlajuć fakt ałkaholnaha apjanieńnia.
U katastrofie zahinuli ŭsie čatyry čałavieki, jakija znachodzilisia na borcie, u tym liku 63-hadovy prezident Total Krystof de Maržery.
U čaćvier Śledčy kamitet paviedamiŭ ab zatrymańni čatyroch rabotnikaŭ aeraporta — viadučaha inžyniera aeraporta Uładzimira Ledzianiova, jaki kiravaŭ, jak paviedamlajecca, pracami pa ŭborcy śniehu, kiraŭnika palotaŭ Ramana Dunajeva, dyśpietčara Alaksandra Kruhłova i dyśpietčara-stažora Śviatłanu Kryŭsun, jakija kiravali palotami.
Śledčyja dapytali ŭsich čaćviarych u jakaści padazravanych.
«Jak ličyć śledstva, nazvanyja asoby nie harantavali vykanańnie patrabavańniaŭ biaśpieki palotaŭ i praviadzieńnia naziemnych rabot, što pryviało da trahiedyi. Zatrymanyja dapytanyja ŭ jakaści padazravanych», — skazali śledčyja ŭ čaćvier.
Pa słovach pradstaŭnika Śledčaha kamiteta Uładzimira Markina, rasśledavańnie kryminalnaj spravy praciahvajecca.
U aŭtorak śledčyja zatrymali kiroŭcu śniehaŭboračnaj mašyny, jakuju začapiŭ samalot, Uładzimira Martynienkava. U čaćvier, jak miarkujecca, Martynienkavu buduć pradjaŭleny abvinavačańni.
Kamientary