Ministerstva achovy zdaroŭja: Vierahodnaść praniknieńnia Eboły ŭ Biełaruś vielmi nizkaja

Vierahodnaść praniknieńnia Eboły ŭ Biełaruś isnuje, ale jana vielmi nizkaja, zajaviŭ siońnia ŭ Minsku žurnalistam namieśnik ministra achovy zdaroŭja — hałoŭny dziaržaŭny sanitarny ŭrač Biełarusi Ihar Hajeŭski.

Pavodle jaho słoŭ, u Ministerstva achovy zdaroŭja pieryjadyčna iduć listy ad hramadzian, jakich niepakoić, ci dastatkova sistema achovy zdaroŭja Biełarusi hatovaja da abarony nasielnictva ad raspaŭsiudžvańnia virusu Eboła ŭnutry krainy. 

«U sakaviku, kali ź`iaviłasia pieršaja infarmacyja ab hetym zachvorvańni, my padrychtavali listy va ŭsie zacikaŭlenyja instancyi i adpravili dla taho, kab jany prajaŭlali dadatkovuju naściarožanaść, — cytuje Hajeŭskaha dziaržaŭnaje ahienctva BiełTA. — My znachodzimsia ŭ pastajannaj hatoŭnaści i vučebna-trenirovačnaj fazie, sistema hatovaja da sustrečy z hetaj prablemaj, ale rassłablacca my nie možam, my nie majem na heta prava, tamu štodzionna tyja ci inšyja słužby i viedamstvy praviarajucca, my arhanizoŭvajem treniroŭki ci vučeńni».

Jon paviedamiŭ, što z maja pa kastryčnik pa padazreńni na lichamanku Eboła byli abśledavanyja niekalki nihieryjskich hramadzian, jakija vučacca ŭ biełaruskich VNU. «U našym aeraporcie było vyjaŭlena piać takich hramadzian, u Viciebsku — adzin. Heta byli studenty ź Nihieryi, jakija prybyvali da miesca vučoby, — skazaŭ Hajeŭski. — U šaści ź ich praz dystancyjnuju teramietryju było ŭstanoŭlena pavyšeńnie tempieratury, jany adrazu byli izalavanyja i špitalizavanyja ŭ śpiecyjalizavanuju miedycynskuju arhanizacyju. Tam jany naziralisia, u ich zabiraŭsia materyjał na abśledavańnie, praz 8—10 hadzin my atrymlivali vynik. Usie vyniki byli admoŭnymi».

Hajeŭski zaznačyŭ, što vierahodnaść praniknieńnia Eboły ŭ Biełaruś isnuje, tamu što kraina znachodzicca ŭ centry Jeŭropy i nie izalavanaja. «U nas raźvity roznyja transpartnyja znosiny ź inšymi krainami, my nie zakrytaje hramadstva. Ale vierahodnaść praniknieńnia lichamanki Eboła ŭ Biełaruś pry hetym vielmi nizkaja. U nas nie takija ciesnyja kantakty z afrykanskimi krainami, jak u ZŠA ci Rasii», — padkreśliŭ jon.

Hajeŭski taksama dadaŭ: «Najbolšaja vierahodnaść — što studenty ź Nihieryi mohuć pryvieźci heta zachvorvańnie. Ale ŭ Nihieryi zafiksavana nievialikaja kolkaść zachvorvańniaŭ, i pakul hety praces nie raspaŭsiudžvajecca ŭ krainie. Tym nie mienš kožny čałaviek, jaki pryjazdžaje z hetaj krainy, z samymi małymi prykmietami zachvorvańnia znachodzicca pad nazirańniem jak minimum 21 dzień».

Pavodle zamiežnych ŚMI, dvoje chvorych z padazreńniem na lichamanku Eboła byli špitalizavanyja ŭ Bielhii i Polščy. Abodva mužčyny niadaŭna viarnulisia z-za miažy, dzie kantaktavali z žycharami Zachodniaj Afryki.

Hiemarahičnaja lichamanka Eboła — śmiarotnaja chvaroba, jakaja raspaŭsiudžvajecca praz pramy nieabaronieny kantakt z kryvioj ci vydzialeńniami inficyravanaha čałavieka, u vyniku kantaktaŭ z pradmietami, jakija byli zabrudžany ad zaražanaha čałavieka. Inkubacyjny pieryjad składaje ad dvuch da troch tydniaŭ.

• 0
• 0
• 0
• 0
• 0
• 0
• 0
• 0