Prakuroram Hrodzienskaj vobłaści pa materyjałach pravierki, praviedzienaj UKDB, raspačata sprava pa art. 429 KK (niezakonny ŭdzieł u pradprymalnickaj dziejnaści) u dačynieńni da načalnika inśpiekcyi Ministerstva pa padatkach i zborach pa Ašmianskim rajonie.
Jak paviedamili BiełaPAN u Hienieralnaj prakuratury, ustanoŭlena, što, parušajučy patrabavańni zakonaŭ «Ab baraćbie z karupcyjaj» i «Ab dziaržaŭnaj słužbie», jakimi dziaržsłužačym zabaroniena zajmacca pradprymalnickaj dziejnaściu asabista abo praz davieranych asob, načalnik inśpiekcyi faktyčna ažyćciaŭlaŭ takuju dziejnaść, składajučy ŭstanoŭčyja, finansavyja i buchhałtarskija dakumienty, vykonvajučy inšyja administracyjna-haspadarčyja i arhanizacyjna-rasparadčyja funkcyi na pryvatnym vytvorča-handlovym unitarnym pradpryjemstvie «Babroŭdreŭ» u Ašmianach.
Pry hetym, vykarystoŭvajučy svaje słužbovyja paŭnamoctvy, jon spryjaŭ dziejnaści PVHUP «Babroŭdreŭ» šlacham utojvańnia viadomych jamu faktaŭ pracaŭładkavańnia ŭ nazvanuju strukturu nie mienš čym piaci najomnych rabotnikaŭ biez adpaviednaha dakumientalnaha afarmleńnia. Pieradavaŭ im u jakaści zarabotnaj płaty najaŭnyja hrašovyja srodki, sadziejničaŭ uchileńniu kiraŭnictva pradpryjemstva ad praduhledžanych zakanadaŭstvam abaviazkovych strachavych uznosaŭ i inšych płaciažoŭ u biudžet dziaržaŭnaha pazabiudžetnaha Fondu sacyjalnaj abarony nasielnictva i padachodnaha padatku, što sadziejničała pavyšeńniu dachodnaści hetaj kamiercyjnaj arhanizacyi.
Kryminalnaja sprava nakiravana dla papiaredniaha rasśledavańnia va ŭpraŭleńnie Śledčaha kamiteta pa Hrodzienskaj vobłaści.
Kamientary