Cimašenka krytykuje Pucina: «Vorah numar 1», «Kab mazhi ŭ jaho kančatkova nie źjechali» VIDEA

Liderka partyi «Baćkaŭščyna» Julija Cimašenka vystupiła ŭ piatnicu ŭviečary z šeraham rezkich zajavaŭ na adras prezydenta Rasiei Uładzimira Pucina ŭ suviazi z aneksijaj Rasiejaj ŭkrainskaha Krymu.

U šmathadzinnym teleefiry prahramy «Šuster łajv» na Pieršym nacyjanalnym telekanale jana, u pryvatnaści, nazvała Pucina «voraham numar adzin» dla Ŭkrainy, tamu što jon «zabraŭ našu ziamlu siłaj zbroi» i «siońnia ŭ Krymie robić rečy, jakija nie sumiaščalnyja z maralnaściu».

Cimašenka vykazała ŭpeŭnienaść, što Ŭkraina viernie Krym — pa jaje słovach, heta «pytańnie niadoŭhaha času». A zaraz, skazała jana, hałoŭnaja zadača — «zrabić usio, kab rasiejski ahresar nie zrabiŭ nivodnaha kroku na kantynentalnuju Ŭkrainu». Ale palityk pieraścierahła: «My pavinny być zaŭsiody hatovyja da taho, što Pucin pierastupić rysu». «Trymajem kułaki, kab… mazhi ŭ Pucina kančatkova nie syšli nastolki, što jon nie adčuvaje pad saboj ziamli. Ale kali jon budzie rabić krok — my budziem adkazvać», — skazała Cimašenka.

Lider «Baćkaŭščyny» ličyć, što pieramovy z prezydentam Rasiei śviet pavinien pravodzić «z pazycyi siły». Jana ličyć, što heta ŭžo adbyvajecca, i «praź miesiac Pucin budzie prasić demakratyčny śviet sieści za stoł pieramovaŭ», ale tady «nia fakt», što ź im za hety stoł siaduć.

Na jaje dumku, prezydent Rasiei, nia zdoleŭšy palityčna «ŭziać Ukrainu», vyrašyŭ zrabić heta vajennym čynam. Pucin vyrašyŭ «pierafarmatavać śviet, pieratreści suśvietny paradak», ale zachop Krymu stanie dla jaho «pačatkam kanca», ličyć lider «Baćkaŭščyny».

Cimašenka taksama zajaviła, što ŭ vypadku ŭvarvańnia rasiejskich vojskaŭ na kantynentalnuju terytoryju Ŭkrainy «śviet nia spynicca». Pavodle jaje słovaŭ, užo zapuščanyja doŭhaterminovyja prahramy, źviazanyja, u pryvatnaści, z «poŭnym farmatavańniem suśvietnych rynkaŭ pryrodnaha hazu».

Pavodle jaje słovaŭ, z-za hetych dziejańniaŭ, inšyja sankcyi suśvietnaj supolnaści — heta ŭžo praź niekalki miesiacaŭ budzie adčuvalna ŭ Rasiei nastolki, što jaje biudžet pachiśniecca. «I heta tolki pačatak. U bližejšy čas moža nastupić taki peryjad, kali rasiejskaja ekanomika i finansy pačnuć chistacca i nia vytrymajuć hetaha cisku», — ličyć Cimašenka.

«Pucinskaja Rasieja — ahresiŭnaja, aŭtarytarnaja, karumpavanaja, ekanamična adstałaja — siońnia prajhrała Ŭkrainie raz i nazaŭždy», — zajaviła Cimašenka. Pavodle jaje słoŭ, pavinna paŭstać pytańnie, «ci nia straciŭ Pucin Ukrainu nazaŭždy». I jana ličyć, što mienavita tak i adbyłosia, tamu što Ukraina nikoli nie pahodzicca z tym, što «lider bratniaha narodu» pajšoŭ na jaje vajnoj.

Jak ličyć Julija Cimašenka, Uładzimir Pucin svaimi dziejańniami vyklikaŭ rezki rost va Ŭkrainie kolkaści prychilnikaŭ ustupu ŭ NATA, zrabiŭšy dla hetaha «bolš, čym usia systema ahitacyi NATA za dziasiatki hadoŭ».

Jak piša asabisty sajt Julii Cimašenki, «pazycyju Julii Cimašenki adnosna sytuacyi ŭ Krymie i va Ŭkrainie padtrymała bolš za 80 % aŭdytoryi, što prysutničała ŭ studyi prahramy «Šuster LIVE».

«U kancy prahramy 53% udzielnikaŭ prahramy padtrymali vyłučeńnie Julii Cimašenki kandydatam na prezydenta ad partyi «Baćkaŭščyna» «na prezydenckich vybarach, jakija pavinny adbycca va Ŭkrainie 25 traŭnia», — zajaŭlaje jaje asabisty sajt.

U sacyjalnych sietkach častka kamentataraŭ uspryniała hety teleefir mienavita jak pačatak prezydenckaj kampanii Cimašenki. Vodhuki na jaje vystup nieadnaznačnyja. Siarod stanoŭčych — novy imidž Cimašenki, toje, što jana kazała na šmat važnych temaŭ i pavodziła siabie jak vydatny psycholah. Krytyčnyja kamentatary, u pryvatnaści, źviartali ŭvahu, što skład prysutnych u studyi byŭ prychilny da jaje, što Cimašenka na mnohija pytańni nie davała kankretnych adkazaŭ i vystupała jak papulist.

Julija Cimašenka na dniach viarnułasia va Ŭkrainu ź lekavańnia ŭ Niamieččynie, dzie jana ŭ značnaj stupieni vylekavałasia mienš čym za dva tydni paśla taho, jak lekavańnie źniavolenaj Cimašenki ŭ Charkavie nie davała vynikaŭ amal dva hady.

Siarod krytykaŭ Cimašenki isnuje mierkavańnie, što były premjer-ministar, dazvalajučy sabie čas ad času rezkija słovy ŭ adras Pucina, dziejničała časam faktyčna jamu na karyść, u pryvatnaści, z padpisańniem hazavych pahadnieńniaŭ 2009 hodzie, jakija praduhledžvali vysokija ceny, abo z admovaj asudzić ahresiju Rasiei suprać Hruzii i h. d. Prychilniki Cimašenki kateharyčna adprečvajuć takija śćviardžeńni.

• 0
• 0
• 0
• 0
• 0
• 0
• 0
• 0