Užo jak minimum dva fanaty BATE asudžanyja za akcyju salidarnaści z Ukrainaj
Na viečar piatnicy viadoma, što minimum dvoje fanataŭ futbolnaha kłuba BATE praviaduć u izalatary časovaha ŭtrymańnia piaciora sutak za akcyju padtrymki Majdanu.
«Naša Niva» paviedamlała pra pieršaha zatrymanaha ŭ abied, adnak vyśvietliłasia, što heta nie adziny vypadak.
«Siońnia byŭ jašče adzin sud nad fanatam futbolnaha kłuba BATE. Chłopcu patelefanavali dadomu i zaprasili na razmovu. Paśla taho, jak čałaviek paprasiŭ vysłać jamu pozvu, supracoŭniki milicyi pryjechali i zabrali z domu.
Paśla adviedzienych pa zakonie troch hadzin «da vyśviatleńnia asoby» ŭ Barysaŭski HAUS pajechaŭ baćka chłopca z advakatam. U adździele paviedamili, što zatrymanaha razam z materyjałami spravy pavieźli ŭ sud. Nastupnyja dźvie hadziny admaŭlalisia naohuł paviedamlać pra jaho miescaznachodžańnie.
Da čałavieka nie dapuskali advakata, jak i ŭ papiarednim vypadku, jaho pa-cichamu pryvieźli ŭ sud i asudzili. I heta ŭ prysutnaści ŭ sudzie baćki i advakata», — paviedamlaje sajt belultras.by.
Adzin z fanataŭ BATE paviedamiŭ «Našaj Nivie»: «Našych znachodziać praz Ukantakcie. Paraŭnoŭvajuć fota dy vyzvońvajuć. Kłoŭny. Daviałosia vydalać staronku dy stvarać novuju».
Na fanackich forumach Ukantakcie prachodziać paviedamleńni, što jašče ŭ pačatku tydnia supracoŭniki pravaachoŭnych orhanaŭ prychodzili da fanataŭ «Dynama», jakija taksama vykazalisia ŭ padtrymku Majdanu.
Fanaty BATE zładzili svaju akcyju salidarnaści z Ukrainaj na minułych vychadnych. Kala dvaccaci čałaviek sfatahrafavalisia ź bieł-čyrvona-biełym ściaham i płakatami «Trymajsia, Ukraina, my z taboj» i «Słava hierojam». Fotki trapili ŭ internet, dzie byli pazityŭna ŭspryniatyja.
Nakolki viadoma «Našaj Nivie», zatrymanym inkryminujuć nie maciuki (drobnaja chulihanka), a ŭdzieł u niesankcyjanavanaj masavaj akcyi, palityčny artykuł.
Na pratestancki fiestyval u «Čyžoŭku-Arenu» jedzie amierykanski prapaviednik Franklin Hrem. Razam ź im čakajuć Koŭła z žonkaj14
Kamientary