«My poŭnyja rašučaści narmalizavać hetu situacyju», — zajaviŭ Alaksandr Łukašenka 10 vieraśnia z nahody pryznačeńnia pasłoŭ u šerah dziaržaŭ, kamientujučy biełaruska-rasijski kalijny kanflikt.
«Ja ŭžo pra heta publična vykazaŭsia — chaču kankretyzavać. Siońnia ŭ suviazi ź nieprystojnymi dziejańniami hetych rasijskich niahodnikaŭ u nas skłalisia peŭnyja prablemy z realizacyjaj kalijnych uhnajeńniaŭ», — cytuje Łukašenku jaho pres-słužba.
«Pytańnie nie tolki ŭ tym, što heta naša asnoŭnaja kampanija (choć heta nie asnoŭny padatkapłacielščyk, ale vielmi bujny), — zaŭvažyŭ jon. — Pytańnie ŭ tym, što heta ŭsio ž taki kalektyŭ, horadaŭtvaralnaje pradpryjemstva, tvar našaj krainy.
My niamała ŭkłali pracy i srodkaŭ, kab pryvieści ŭ pačućcio heta pradpryjemstva, horad-pryhažun pabudavali».
«Ź luboha boku, ź jakoha ni padydzi, heta — kaštoŭnaść dla našaj dziaržavy, i my pavinny nie toje što nie stracić (my jaho, viadoma ž, nikoli ŭ žyćci nie stracim i nikomu nie addadzim na razarvańnie),
my pavinny jak maha chutčej uvajści ŭ toje rečyšča dziejnaści pradpryjemstva, jakim jano było ŭ lepšyja pieryjady, — padkreśliŭ Łukašenka.
— A ŭ lepšyja pieryjady kraina atrymlivała bolš za 3 miljardy dalaraŭ prybytku ad realizacyi kalijnych uhnajeńniaŭ. Zrazumieła, što rynak ciapier niaprosty. Jon da abvału byŭ składanym, bo ekanomika suśvietnaja ŭ kryzisie.
A dziejańni akcyjanieraŭ z boku „Urałkalija“ jašče bolš uskładnili situacyju na mižnarodnym rynku kalijnych uhnajeńniaŭ».
Tym nie mienš, pa słovach Łukašenki, biełaruski bok nastrojeny narmalizavać situacyju.
«Ja čamuści pierakanany, što i rasijanie prymuć adpaviednaje rašeńnie, i kiraŭnictva Rasii takuju mahutnuju rasijskuju kampaniju biez uvahi nie kinie.
Rana ci pozna, dla taho kab adnavić status-kvo i toje, što było raniej, rasijcy pryjduć da nas.
Prynamsi, my nie suprać pracavać tak, kab byli vialikija dachody. Što dla hetaha treba zrabić, całkam zrazumieła» , — skazaŭ Łukašenka.
Nahadajem, što 30 lipienia rasijskaja kampanija «Urałkalij» abviaściła pra svoj vychad sa składu biełaruska-rasijskaha ZAT «Biełaruskaja kalijnaja kampanija» (BKK), praź jakuju razam z «Biełaruśkalijem» pastaŭlali svaju pradukcyju na źniešnija rynki. Svajo rašeńnie rasijanie patłumačyli tym, što biełaruski bok pačaŭ ekspartavać pradukcyju «Biełaruśkalija» ŭ abychod BKK.
26 žniŭnia Hienprakuratura Biełarusi paviedamiła ab zaviadzieńni kryminalnaj spravy ŭ dačynieńni da šerahu kiraŭnikoŭ ZAT «Biełaruskaja kalijnaja kampanija» (BKK), siarod jakich staršynia naziralnaj rady BKK, hiendyrektar «Urałkalija» Uładzisłaŭ Baŭmhiertnier. Jany abvinavačvajucca pa č. 3 art. 424 KK (złoŭžyvańnie ŭładaj i słužbovymi paŭnamoctvami).
Baŭmhiertnier byŭ zatrymany ŭ Minsku i zaraz znachodzicca ŭ SIZA KDB.
2 vieraśnia Śledčy kamitet Biełarusi abjaviŭ ab zaviadzieńni kryminalnaj spravy ŭ dačynieńni da hałoŭnaha akcyjaniera «Urałkalija» Sulejmana Kierymava. Jon taksama abvinavačvajecca ŭ arhanizacyi złoŭžyvańni ŭładaj i słužbovymi paŭnamoctvami. Kierymaŭ abvieščany ŭ mižnarodny vyšuk.
5 vieraśnia Łukašenka padpisaŭ ukaz № 399 «Ab udaskanaleńni ekspartu kalijnych uhnajeńniaŭ». Jon praduhledžvaje stvareńnie novaj handlovaj kampanijaj, jakaja budzie ažyćciaŭlać prodaž kalijnych uhnajeńniaŭ — AAT «Biełaruskaja kalijnaja kampanija».
Ciapier čytajuć
«Ja jedu natchnicca ŭkraincami». Śviatłana Cichanoŭskaja pačała aficyjny vizit va Ukrainu11
Kamientary