Сёння ў шведскім парламенце ў Стакгольме адбылася дыскусія па пытанню Чэмпіянату свету па хакеі, што мае адбыцца ў Мінску ў 2014.Галоўным удзельнікам сустрэчы быў Крыстэр Энглунд (Christer Englund), старшыня Шведскай нацыянальнай федэрацыі хакея і адзін з кіраўнікоў Міжнароднай федэрацыі хакея з шайбай.
Крысціян Хольм, дэпутат парламента (Партыя Мадэратаў/Кансерватары) і арганізатар сустрэчы, разам са сваімі калегамі, меў на мэце выказаць крытычную пазіцыю парламента Швецыі да правядзення чэмпіянату.
На сустрэчы прысутнічалі пару дзесяткаў чалавек, якія прадстаўлялі розныя палітычныя партыі і праваабарончыя арганізацыі, а таксама звычайныя супрацоўнікі парламента, але ўсе мелі аднолькавы пасыл да прадстаўніка арганізацыі, якая прымала рашэнне па наданні Беларусі правоў па правядзенні чэмпіянату — Беларусь і беларускі народ заслугоўваюць такое спаборніцтва, але не Лукашэнка і ягоны рэжым.
Парламентары падзяляюць меркаванне, што спорт і палітыка мусяць быць асобна, але прысутныя палітыкі, як і Крысціян Хольм, мяркуюць, што нават спорт не павінен страціць каштоўнасцяў дэмакратыі і правоў чалавека, і высокія патрабаванні ў гэтай сферы садзейнічаюць падтрымцы і развіццю дэмакратыі ва ўсім свеце.Крысціян Хольм, які таксама з’яўляецца старшынём групы па пытаннях Беларусі ў парламенце Швецыі, лічыць, што само рашэнне даць Лукашэнку права правядзення чэмпіянату ёсць вялікай памылкай ад самага пачатку.
Крыстэр Энглунд, у сваю чаргу, адзначыў, што адзінае, з чым Міжнародная федэрацыя хакею лічыцца перадусім — гэта тэхнічныя магчымасці краіны на арганізацыю і правядзенне чэмпіянату, адхіліўшы гэтым усе факты парушэнняў правоў чалавека ў Беларусі.
Адно з патрабаванняў, якое Міжнародная федэрацыя хакею будзе мець да беларускіх ўладаў тычыцца візавага пытанне.
Так, ад беларускіх уладаў будзе патрабавацца поўнае палягчэнне візавага рэжыму для замежных журналістаў і гульцоў чэмпіянату, ці поўнае скасаванне візавага рэжыма для дадзенай групы людзей.
«Нельга абмяжоўвацца клопатам толькі пра замежных журналістаў. Мы мусім думаць перадусім пра прадстаўнікоў мясцовых, незалежных СМІ ў Беларусі», — дадаў Крысціян Хольм.
На пытанне, ці адрэагавала Міжнародная федэрацыя хакея на падзеі пасля прэзідэнскіх выбараў 2010 і цяперашнюю сітуацыю ў краіне, прадстаўнік федэрацыі адзначыў, што яны факусуюць сваю ўвагу на тэхнічным прагрэсе Беларусі па арганізацыі чэпміянату.«У часе сустрэчы, мы выказалі наш погляд па дадзеным пытанні, і што мы шчыра спадзяемся на магчымы перанос чэмпіянату з Беларусі, ведаючы пра рэпрэсіўны рэжым Лукашэнкі. Асабіста я лічу, што спартовае мерапрыемства падобнага маштабу не павінна праводзіцца ў дыктатуры. Пакуль рэжым трымае ў закладніках палітычных вязняў і не правозіць аніякіх дэмакратычных рэформаў, краіна павінна быць цалкам выкрэсліная нават з лісту магчымых кандытатаў на правядзенне такіх мерапрыемстваў», — адзначыў Крысціян Хольм падчас сустрэчы.
Каментары