Мінздароўя: На фармрынку Беларусі няма фальсіфікаваных лекавых сродкаў
На фармрынку Беларусі няма фальсіфікаваных лекавых сродкаў, заявіла начальнік упраўлення фармацэўтычнай інспекцыі і арганізацыі лекавага забеспячэння Міністэрства аховы здароўя Людміла Равуцкая 12 кастрычніка напрэс-канферэнцыі ў Мінску.
«У нас абсалютна выключана сітуацыя допуску няякаснай прадукцыі, таму што ўсе лекавыя сродкі, якія зарэгістраваны ў краіне, абавязкова праходзяць кантроль якасці для допуску на рынак», — сказала яна.
Паводле слоў спецыяліста, прэпараты паступаюць па прамых кантрактах ад вытворцаў або іх афіцыйных дыстрыб’ютараў, а да паступлення ў аптэчную сетку праходзяць кантроль якасці ў акрэдытаваных Міністэрствам аховы здароўя лабараторыях. Тут таксама праводзіцца поўны комплекс выпрабаванняў. Праверка лекаў вядзецца на стадыі рэгістрацыі і пры паступленні на рынак.
Як паведаміла Равуцкая, сёлета было праверана больш за 70 тысяч партый лекавых сродкаў. Прынята 105 рашэнняў аб канфіскацыі медыкаментаў, у асноўным на стадыі допуску да рынку. З іх 10 адносіліся да прадукцыі расійскіх вытворцаў, 12 — украінскіх, 13 — беларускіх. Равуцкая адзначыла, што ў абсалютных лічбах паказчык канфіскацыі беларускай прадукцыі вышэйшы, таму што значная яе частка на фармрынку: у дзяржаўнай аптэчнай сетцы айчынныя лекавыя сродкі займаюць да 30% прадукцыі.
Адказваючы на пытанне, ці не будзе беларускі фармрынак адчуваць небяспеку пранікнення фальсіфікаваных лекаў з Расіі ў сувязі з уваходжаннем Беларусі ў Мытны саюз, Равуцкая падкрэсліла, што аб узаемным прызнанні рэгістрацыі пакуль гаворка не ідзе.
«Уваходжанне ў Мытны саюз, — сказала яна, — не азначае аўтаматычнага прызнання зарэгістраваных у Расіі ці Казахстане лекавых сродкаў». Зараз у кожнай з краін — членаў Мытнага саюза дзейнічае ўласная сістэма рэгістрацыі і кантролю якасці медпрэпаратаў. «Мы будзем імкнуцца да таго, каб у нас была адзіная сістэма рэгістрацыі лекаў па аналогіі з краінамі ЕС», — заявіла Равуцкая.
Цяпер чытаюць
Што за Дзмітрый Скіндзераў, які абвясціў вайну Ціханоўскай? Супрацоўніцтва з ГУБАЗіКам, даўгі ў Беларусі, даўгі ў Літве44
Каментары