«Яндэкс Маркет» і Ozon пасля ўдараў па складах Wildberries таксама знялі з сябе адказнасць за страты тавараў пры атаках
Маркетплэйсы «Яндэкс Маркет» і Ozon змянілі ўмовы сваіх дамоў з прадаўцамі і ўдакладнілі, што не будуць несці адказнасць за страты тавараў у выпадку надзвычайных сітуацый, звязаных з ваеннымі дзеяннямі, ударамі беспілотнікаў і іншымі падобнымі падзеямі, піша The Moscow Times.
«Яндэкс Маркет» 20 ліпеня апублікаваў новую рэдакцыю дамовы аб размяшчэнні тавараў. Змены з’явіліся праз некалькі дзён пасля першых удараў па лагістычных цэнтрах Wildberries. У новым дакуменце кампанія вызваліла сябе ад адказнасці за поўнае або частковае невыкананне абавязацельстваў у выпадку форс-мажорных абставін.
У спіс такіх сітуацый цяпер уключаныя наступствы прымянення зброі, вайсковай тэхнікі, беспілотнікаў, боепрыпасаў і іх частак, а таксама абстрэлы, выбухі, тэракты і ваенныя дзеянні.
Акрамя таго, у новай версіі дамовы «Яндэкс Маркет» прыбраў пункт, паводле якога платформа павінна была неадкладна паведамляць другому боку пра наступленне форс-мажору і пацвярджаць факт такіх абставін.
Раней падобныя змены ўнесла і кампанія Ozon. З 1 ліпеня яна таксама вызваліла сябе ад патрабаванняў прадаўцоў, калі страты ўзніклі з-за ваенных дзеянняў, удараў беспілотнікаў, выбухаў, абстрэлаў або іншых надзвычайных абставін.
Wildberries яшчэ раней пашырыў пералік форс-мажораў, фактычна прызнаўшы атакі на свае склады падставай не выплачваць кампенсацыі за страчаны тавар.
У сярэдзіне ліпеня склады Wildberries у некалькіх рэгіёнах Расіі пацярпелі ад удараў і пажараў. Найбольш сур’ёзныя наступствы былі зафіксаваныя на лагістычных аб’ектах у Катоўску Тамбоўскай вобласці і Электрасталі Маскоўскай вобласці. Паводле паведамленняў, кампанія за адзін дзень страціла каля 10-15% сваіх складскіх магутнасцяў. Таксама паведамлялася пра пашкоджанні складоў у Падольску, Краснадары і Стаўрапольскім краі.
Кіраўніца Wildberries Таццяна Кім заявіла, што кампанія будзе падтрымліваць прадаўцоў, а таксама сем’і загінулых і пацярпелых.
Украінскія дроны дашчэнту спалілі яшчэ два склады Wildberries у Расіі — чацвёрты і шосты па велічыні
Фірма Modum захоўвала на складах Wildberries у Электрасталі і Катоўску траціну сваёй касметыкі
Падчас атакі БПЛА на склад Wildberries у Тамбоўскай вобласці пацярпеў беларус
Чаму Украіна ўдарыла па складах Wildberries і як усюдыісны маркетплэйс звязаны з расійскай арміяй
«Мая праца згарэла». Беларускія бізнэсы страцілі тавар на складах Wildberries, але маюць больш шанцаў на кампенсацыю, чым расіяне
Цяпер чытаюць
Сустрэчу Рыжанкова з Сікорскім папрасіў Мінск. Што каманда Ціханоўскай абмяркоўвала з палякамі да і пасля яе9
Каментары