Мяжу з Польшчай за паўгода спрабавалі незаконна перасячы ўсяго 235 разоў
За першае паўгоддзе 2026 года польскія памежнікі зафіксавалі ўсяго толькі 235 спроб незаконнага перасячэння мяжы з боку Беларусі. Для параўнання, за аналагічны перыяд мінулага года было зарэгістравана больш за 15,5 тысячы такіх выпадкаў, паведаміла Міністэрства ўнутраных спраў Польшчы.
У Міністэрстве ўнутраных спраў Польшчы заявілі, што за гэты час не было ніводнай паспяховай спробы незаконнага перасячэння мяжы, ацаніўшы эфектыўнасць аховы на 100%.
Паводле даных ведамства, колькасць людзей, якім удалося незаконна трапіць у Польшчу, таксама паступова змяншалася: каля 12 тысяч у 2023 годзе, прыкладна 5 тысяч у 2024‑м і каля 1,7 тысячы ў 2025 годзе.
У польскім МУС адзначылі, што такіх вынікаў удалося дасягнуць дзякуючы маштабным інвестыцыям у ахову мяжы. На ўмацаванне польска-беларускай граніцы было накіравана каля 3 мільярдаў злотых (каля 790 мільёнаў даляраў). Улады краіны лічаць, што гэта дазволіла істотна павысіць эфектыўнасць супрацьдзеяння незаконнай міграцыі.
Міграцыйны крызіс на мяжы Беларусі і краін Еўрасаюза пачаўся ў 2021 годзе. Краіны Захаду абвінавачваюць афіцыйны Мінск у арганізацыі патоку мігрантаў пры падтрымцы Расіі, беларускія ўлады гэтыя абвінавачанні адмаўляюць.
Для ўзмацнення бяспекі Польшча пабудавала ўздоўж мяжы з Беларуссю агароджу вышынёй 5,5 метра, а таксама ўстанавіла сістэмы электроннага назірання на большай частцы памежнай лініі.
Цяпер чытаюць
«Што, грохнуць дзяцей Ціханоўскай, каб звярнулі ўвагу на маю праблему?» Як тупы каментар актывіста Дзяніса Дашкевіча стварыў яму праблемы ў Польшчы11
Каментары
[Зрэдагавана]