Нацыянальны сход Францыі ўхваліў закон аб ратыфікацыі пагаднення з Нідэрландамі, якое канчаткова вызначае дзяржаўную мяжу на карыбскім востраве Сен-Мартэн. Такім чынам краіны зрабілі важны крок да ўрэгулявання тэрытарыяльнай спрэчкі, што працягвалася амаль 400 гадоў, піша Politico.
Дакумент зацвярджае пагадненне, падпісанае Францыяй і Нідэрландамі ў 2023 годзе, аб дакладнай дэлімітацыі мяжы паміж французскай заморскай супольнасцю Сен-Мартэн і нідэрландскай самакіравальнай тэрыторыяй Сінт-Мартэн.
Востраў Сен-Мартэн размешчаны ў Карыбскім моры і падзелены паміж дзвюма дзяржавамі. Францыі належыць паўночная частка вострава, а Нідэрландам — паўднёвая. Пры гэтым на працягу многіх гадоў жыхары маглі свабодна перамяшчацца паміж абедзвюма тэрыторыямі, бо фактычнай памежнай інфраструктуры не існавала.
Гісторыя падзелу вострава пачалася яшчэ ў 1648 годзе, калі Францыя і Нідэрланды дамовіліся падзяліць яго паміж сабой. Аднак дакладная лінія мяжы тады не была вызначаная. На працягу стагоддзяў існавала толькі ўмоўная мяжа, што перыядычна выклікала рознагалоссі адносна выдачы дазволаў, дзейнасці праваахоўных органаў і кіравання прыроднымі рэсурсамі, асабліва ў раёне лагуны, якая знаходзіцца паміж дзвюма часткамі вострава.
Неабходнасць канчаткова вырашыць гэтае пытанне стала асабліва відавочнай пасля разбуральнага ўрагану «Ірма» ў 2017 годзе, які пашкодзіў больш за 95 працэнтаў будынкаў на востраве. Пасля стыхійнага бедства Парыж і Амстэрдам актывізавалі перамовы аб юрыдычным афармленні мяжы.
Дэпутат Нацыянальнага сходу Францыі Бертран Буйкс, які прадстаўляў законапраект у парламенце, заявіў, што Францыя можа ганарыцца тым, што здолела ўрэгуляваць адну са сваіх найстарэйшых тэрытарыяльных спрэчак.
Для таго каб пагадненне ўступіла ў сілу, яго яшчэ павінна ратыфікаваць Каралеўства Нідэрландаў. Пасля гэтага новая мяжа атрымае поўны юрыдычны статус.
Трамп заклікаў Брытанію не аддаваць базу Дыега-Гарсія. Ён кажа, што яна можа спатрэбіцца для ўдараў па Іране
З'явіцца новая дзяржава — Новая Каледонія
Францыя вяртае Мадагаскару чэрап мясцовага караля, якому адсеклі галаву 128 гадоў таму
Францыя пачала выводзіць свае войскі з Сенегала. Яе ўплывы ў Афрыцы ўсё меншаюць
Каментары