Слаламны канал пад Мінскам, які доўгі час выкарыстоўваўся толькі эпізадычна, цяпер запоўнены вадой і будзе працаваць як мінімум усё лета. Пра гэта паведамілі ў «Мінскводаканале». Пры гэтым узровень вады ў канале можа змяняцца ў залежнасці ад патрэб прадпрыемстваў, бо гэта не толькі спартыўны, але і тэхнічны аб’ект, піша Times.by.
Гэты канал — частка Вілейска-Мінскай воднай сістэмы. Яго пабудавалі ў 1981 годзе для правядзення спаборніцтваў па вяслярным слаламе. На той час падобныя аб’екты былі рэдкасцю: у Еўропе існаваў толькі адзін аналаг — у Мюнхене, дзе перад тым у 1972 годзе прайшлі Алімпійскія гульні.
У савецкія часы канал рэгулярна выкарыстоўваўся для спаборніцтваў, але пасля 1991 года пастаянную падачу вады спынілі, і ён працаваў толькі час ад часу.
Цяпер запуск канала мае тэхнічную прычыну, але пры гэтым ён стаў папулярным месцам для адпачынку. З сярэдзіны мая сюды пачалі масава прыязджаць людзі: адныя — каб зрабіць фота, іншыя — каб паспрабаваць сплаў на сапбордах, байдарках або невялікіх лодках. Некаторыя наведвальнікі адзначаюць, што плынь дастаткова моцная і дае адчуванні, падобныя да сапраўднага экстрыму.
Разам з тым спецыялісты папярэджваюць, што канал застаецца прамысловым аб’ектам, а не афіцыйнай зонай для купання ці спорту. Тут няма штрафаў за сплаў, але існуюць рызыкі: хуткасць і ўзровень вады могуць раптоўна змяніцца, а каменныя перашкоды могуць прывесці да траўмаў. Таму людзей заклікаюць быць асцярожнымі і не недаацэньваць небяспеку.
Цяпер чытаюць
Мінскія ўлады расказалі, як будуць змагацца з «акіянам аўтамабіляў» у дварах2
Каментары