Як зрабіць пасведчанне кіроўцы на беларускай мове? Усё прасцей, чым вы думаеце
Дзяўчына, якая нядаўна здавала на правы, падзялілася ў сацсетках гісторыяй, як у акенцы падачы ў яе спыталіся, ці не хоча яна атрымаць пасведчанне на беларускай мове. Аказалася, што многія нават не задумваліся пра такую магчымасць.
«Запісвалася на пераздачу ў ДАІ, і дзяўчына ў акенцы такая: а хочаце пасведчанне на беларускай мове? А я якраз збіралася спытаць у яе, як гэта зрабіць… Узяла мае паперкі і пазначыла тлуста, што пасведчанне мне трэба на беларускай мове», — распавядае сваю гісторыю дзяўчына.
Некаторыя пішуць, што іх таксама спыталі, ці не хочуць яны правы на беларускай.
«І мне прапанавалі ў акенцы! Думала цукеркі прынесці ёй і забылася», — прызнаецца іншая дзяўчына.
Па змоўчванні вашыя даныя ў пасведчанні кіроўцы будуць запоўненыя на рускай. Аднак атрымаць беларускамоўнае пасведчанне зусім не складана.
Калі пытанняў не задаюць, то пры падачы дакументаў трэба самому сказаць, што хочаце, каб пасведчанне было запоўнена на беларускай мове. Звычайна хапае проста сказаць гэта вусна.
Сярод каментатараў знайшліся тыя, хто рабіў так не адзін раз.
«Абодва разы проста падчас падачы дакументаў у акенца казаў, каб пасведчанне было на беларускай», — піша мужчына.
Іншыя афармлялі просьбу пісьмова — ад рукі дадавалі пазнаку «прашу выдаць пасведчанне на беларускай мове».
Некаторыя прызнаюцца, што нават не ведалі пра такую магчымасць.
«Я не ведаў, што так магчыма зрабіць. Шкада, што толькі зараз даведаўся, бо летась у траўні мяняў пасведчанне. Такія рэчы неяк па змоўчванні прымаеш як нязменны факт», — піша адзін з каментатараў.
«Я не ведала пра такое і атрымала па-руску», — дадае іншая дзяўчына.
Цяпер чытаюць
ЗША паведамілі, што вызваленне палітвязняў у Беларусі «адкладзенае на некаторы час»21
Каментары