Прэзідэнт ЗША абвясціў пра запуск урадавага сайта пад назвай TrumpRx, дзякуючы якому амерыканцы змогуць набываць лекі па больш даступных цэнах.
Лекі непасрэдна на сайце прадавацца не будуць, аднак карыстальнікі змогуць знайсці там рэцэптурныя прэпараты і даведацца, колькі можна зэканоміць пры іх набыцці.
Каб купіць лекі менавіта такой цаной, неабходна спампаваць купон і прад’явіць яго ў адной з аптэк-партнёраў. Як альтэрнатыва, партал таксама паказвае магчымасць набыць патрэбны прэпарат непасрэдна ў вытворцы, піша Deutsche Welle.
На момант запуску сайта на ім было прадстаўлена каля 40 медыкаментаў, у тым ліку прэпараты для пахудзення. Аднак журналісты не ўпэўненыя, што спажыўцы сапраўды змогуць атрымаць настолькі значныя зніжкі, якія абяцае Дональд Трамп. Тым часам шэраг фармацэўтычных канцэрнаў ЗША ўжо пагадзіліся прапаноўваць сваю прадукцыю праз сайт TrumpRx са зніжкай.
ЗША лічацца адным з самых дарагіх рынкаў збыту лекаў. У краінах Еўропы і Азіі рэгуляванне рынку, як правіла, больш жорсткае, і існуюць дамоўленасці пра максімальныя цэны.
У ЗША ўжо даўно вядзецца дыскусія пра высокі кошт жыцця. Пры гэтым цэны лекаў — толькі адзін з аспектаў гэтай праблемы. На гэтым фоне Трампа нярэдка крытыкуюць за тое, што ён занадта шмат увагі надае знешняй палітыцы і недастаткова — унутраным праблемам амерыканцаў.
Цяпер чытаюць
«На 15 хвілін выключылі святло — божа мой, з Украінай параўналі». Лукашэнка патлумачыў, колькі эканоміць на вулічным асвятленні45
Каментары