Праз тры гады пасля закрыцця знакамітага аўтобуснага маршруту №666 на Хэльскую касу гэты нумар зноў з’явіцца на дарогах Польшчы. Легендарны рэйс адраджае міжнародны перавозчык FlixBus, піша Еuronews.
Новы летні маршрут злучыць Кракаў з горадам Хэль, а сам шлях пройдзе праз Варшаву і папулярныя курорты Балтыйскага ўзбярэжжа. Навіна пра вяртанне нумара 666 выклікала ажыятаж у медыя і сярод турыстаў.
Гісторыя гэтага рэйса налічвае шмат гадоў. Доўгі час мясцовы маршрут паміж Дэмбкамі і Хэлем абслугоўвала кампанія PKS Gdynia. Нумар стаў сусветна вядомым дзякуючы гульні слоў: назва польскага горада Hel сугучная з англійскім словам hell («пекла»), а лічба 666 у рэлігійнай традыцыі лічыцца «лікам звера».
Турысты з усяго свету палявалі на фота з «аўтобусам у пекла» і дзяліліся імі ў сацыяльных сетках.
Аднак у 2023 годзе пасля шматлікіх пратэстаў і петыцый з боку каталіцкіх суполак перавозчык змяніў нумар на нейтральны 669.
Цяпер FlixBus вырашыў вярнуць папулярны брэнд. Кіраўніцтва кампаніі не хавае, што нумар выбраны свядома з маркетынгавых меркаванняў, бо гэты знак адразу тлумачыць канчатковы пункт падарожжа. Акрамя рэкламнага складніка, рэйс закрые высокі попыт пасажыраў на простыя летнія маршруты да Балтыкі з буйных польскіх гарадоў.
Аўтобус будзе курсіраваць штодня на працягу ўсяго летняга сезона. Падарожжа з Кракава да Хэля зойме каля трынаццаці гадзін, а расклад складзены такім чынам, каб максімальна абмінаць коркі на пад’ездзе да паўвыспы.
Сама назва горада Хэль не мае нічога агульнага з містыкай. Філолагі і гісторыкі схіляюцца да версіі, што слова паходзіць з старажытнагерманскіх моў, дзе яно азначала «дзюну» ці прыбярэжны пагорак. На старадаўніх дацкіх картах гэты пясчаны мыс даўжынёй 35 кіламетраў пазначалі як Heel («пятка») праз яго характэрную геаграфічную форму.
Лукашэнка нервова пракаментаваў візіт Ціханоўскай у Кіеў45
Каментары