Памочнік прэзідэнта Расіі паведаміў, што на тэрыторыі Данбаса па выніках перамоваў аб міры можа не застацца ні расійскіх, ні ўкраінскіх войскаў. Парадак, паводле задумы Крамля, будуць забяспечваць Расгвардыя і расійская паліцыя. Такое заяву ён зрабіў у размове з «Коммерсантом».
Ушакоў падкрэсліў, што тэрыторыя Данбаса «раней ці пазней» пяройдзе пад поўны кантроль Расіі — «калі не перамоўным шляхам, дык ваенным». Паводле яго слоў, ад гэтага «будзе залежаць і ўсё астатняе».
«То бок спыненне агню можа наступіць толькі пасля вываду ўкраінскіх войскаў. А што там будзе потым — пра гэта можна, на маю думку, весці размову. Бо цалкам магчыма, што там не будзе непасрэдна войскаў, ні расійскіх, ні ўкраінскіх. Так, але будзе Расгвардыя, будзе наша паліцыя, будзе ўсё неабходнае для захавання парадку і арганізацыі жыцця», — сказаў ён.
Паводле слоў Ушакова, супраць вываду ўкраінскіх войскаў з Данбаса выступаў Уладзімір Зяленскі, і гэта было «адным з патрабаванняў, якія амерыканцы яму прад’яўляюць». «У любым выпадку, якім бы ні быў расклад, гэта тэрыторыя з’яўляецца тэрыторыяй Расійскай Федэрацыі, і яна будзе пад кіраваннем нашых адміністрацый, так што раней ці пазней», — дадаў ён.
Сваю заяву Ушакоў зрабіў пасля таго, як Уладзімір Зяленскі паведаміў, што ў межах перамоваў аб мірным плане ЗША абмяркоўваецца варыянт са «свабоднай эканамічнай зонай»: «Амерыканцы называюць гэта так, а рускія — «дэмілітарызаванай зонай»».
Паводле слоў Зяленскага, ЗША хочуць, каб украінскія вайскоўцы пакінулі падкантрольную ім тэрыторыю Данбаса, але прапануюць, што Расія не будзе прасоўвацца на гэтую тэрыторыю. Па словах самога Зяленскага, у такім выпадку справядліва спытаць, чаму, калі адзін бок адступае, то другі не адступае на аналагічную адлегласць.
Каментары