У Латвіі ветэрынарная служба заклікала не купляць хатніх жывёл у Беларусі. І гэта не проста прыхамаць
Харчовая і ветэрынарная служба Латвіі заклікала жыхароў краіны не купляць сабак, катоў і хатніх тхароў у Беларусі і Расіі, бо гэта можа быць небяспечна.
Занепакоенасць латвійскіх ветэрынараў выклікала тое, што нядаўна ў Германіі ў сабакі, увезенага ў Еўрапейскі Саюз з Расіі праз латвійскі памежны пункт, пацвердзілі шаленства. Пры гэтым у жывёліны былі ўсе неабходныя дакументы, у тым ліку вынікі аналізу на ўзровень антыцелаў супраць шаленства, якія павінны пацвярджаць эфектыўнасць вакцынацыі.
Раней латвійская служба ўжо звярталася ў Еўрапейскую камісію з просьбай увесці больш строгія абмежаванні на ўвоз жывёл з Расіі і Беларусі, бо кантрольныя органы адразу некалькіх краін выявілі выпадкі падробленых сертыфікатаў аб вакцынацыі. У выніку з восені 2024 года да дакументаў абавязкова трэба прыкладаць тэст на антыцелы, які павінен гарантаваць, што жывёліна сапраўды вакцынаваная і не ўяўляе небяспекі.
Тым не менш, у гэтым выпадку сабака быў завезены ў Германію ў лістападзе 2025 года, а прыкметы хваробы з’явіліся і дыягназ быў пастаўлены толькі ў лютым 2026 года.
Пры праверцы высветлілася, што ніводная з жывёл, якія знаходзіліся ў той жа самай партыі і накіроўваліся ў Германію, не засталася ў Латвіі. Таксама былі ўстаноўленыя асобы, якія кантактавалі з гэтымі жывёламі, у тым ліку супрацоўнікі памежнага кантролю. Пра сітуацыю праінфармаваны і Цэнтр прафілактыкі і кантролю захворванняў.
Апошні выпадак шаленства ў дзікіх жывёл у Латвіі быў зафіксаваны ў 2010 годзе, а ў хатніх — у 2012 годзе. Такім чынам, краіна мае статус тэрыторыі, свабоднай ад шаленства, і не хоча яго страціць.
У Латвіі прыбяруць з дарожных знакаў назвы беларускіх гарадоў. Не шкада і 120 тысяч еўра
Лідары Латвіі і Эстоніі заклікалі рыхтавацца да прамых перамоў з Расіяй
Даўгаўпілская бальніца ў Латвіі звольніла 49 супрацоўнікаў з грамадзянствам Беларусі і Расіі
Латвія закрывае рэгулярныя аўтобусныя рэйсы ў Беларусь
Каментары