«Дзевяць курэй за ноч». Вёску на Міншчыне аб'ядае ліса — і вывезці яе нельга
У вёсцы Будзённага Астрашыцка-Гарадоцкага сельсавета жыхары ўжо не першы дзень назіраюць адну і тую ж карціну: па вуліцах і падворках свабодна разгульвае ліса. Яна поркаецца ў сметніцах, заходзіць у двары і, паводле словаў мясцовых, адчувае сябе як дома, піша pristalica.by.
Дзевяць курэй за ноч і напад на сабаку
«Бегае па ўсёй вёсцы, часта бачыла яе на Славянскай і Мірнай, — расказвае мясцовая жыхарка Кацярына Цывіс. — Баімся за хатніх жывёл і дзяцей. Ліса ўкормленая, не баіцца нікога, прыходзіць начамі, як да сябе дадому. Мы звярталіся ў сельсавет, нас накіравалі ў ветстанцыю, але там толькі зачыталі лекцыю пра правілы бяспекі. А праблема засталася».
У агульным чаце вёскі скаргаў становіцца больш. Адна жанчына напісала, што за ноч ліса задушыла ў яе дзевяць курэй, а яшчэ некалькіх унесла. Іншы мясцовы жыхар паведаміў, што на вуліцы Лугавой звер напаў на сабаку. Жыхары асабліва перажываюць за дзяцей: ліса з'яўляецца каля прыпынку школьнага аўтобуса і ідзе за дзецьмі.
Чаму ні сельсавет, ні ветстанцыя не могуць дапамагчы
Старшыня сельвыканкама Андрэй Мацкевіч пацвярджае, што такія выпадкі ў раёне ўжо не рэдкасць — лісы заходзілі і ў Брадок, і ў Галіцу. Але вырашыць праблему хутка немагчыма: адстрэл у населеным пункце забаронены, камунальныя службы дзікіх жывёл не ловяць.
Галоўны ветдоктар Мінскага раёна Генадзь Залатуха пацвердзіў, што работнікі ветстанцыі таксама не могуць забраць жывёлу, калі яна здаровая і не знаходзіцца ў бядотным становішчы:
«Тое, што дзікая ліса спрабуе пракарміцца і крадзе курачак — гэта натуральныя для яе паводзіны. Калі паступіў сігнал з вёскі Будзённага, мы змаглі толькі пагаварыць з жыхарамі, растлумачыць, як правільна і бяспечна адпуджваць звера — фізічна, хімічна, але без шкоды для чалавека і жывёлы. Часам раім звяртацца і ў асацыяцыю зоаабарончых арганізацый. Але злавіць ці вывезці здаровую лісу мы не можам і не будзем — закон гэтага не дапускае».
Тым часам жыхары працягваюць фіксаваць новыя з'яўленні лісы і спадзяюцца, што да сур'ёзных наступстваў справа не дойдзе. Пакуль жа вёска прывыкае жыць з няпрошанай госцяй, якая ходзіць па вуліцах так упэўнена, быццам таксама лічыць вёску Будзённага сваім домам.
Цяпер чытаюць
Змрочныя прагнозы спраўджваюцца. Чаму Захад абірае стратэгію «Не злаваць дзеда» і чаго чакаць далей2
Каментары