На мяжы з Польшчай беларускі кіроўца збіў дзяўчыну, якая не давала яму праехаць без чаргі
Інцыдэнт адбыўся ўначы 10 лістапада перад пунктам пропуску «Тэрэспаль». Паводле слоў сведак, кіроўца аўтамабіля з брэсцкімі нумарамі спрабаваў аб’ехаць чаргу, каб праехаць хутчэй, але людзі, якія чакалі перад ім, не дазвалялі яму гэта зрабіць, піша «Медыязона».
Паміж кіроўцам і прысутнымі ўзнік канфлікт — мужчына настойваў, што яму трэба праехаць да «Цэнтрума». Людзі прапанавалі пакінуць машыну на стаянцы і ісці пешшу, але ён адмовіўся і паехаў на натоўп, зачапіўшы дзяўчыну. Тая ўпала на дарогу.
Пасля гэтага вакол аўтамабіля сабралася група людзей, пачалася спрэчка. Відэа здарэння хутка апынулася ў прыгранічных чатах, дзе карыстальнікі паведамілі, што прадэманстравалі яго польскім памежнікам. Паводле іх слоў, кіроўцу затрымалі для разбору.
У чатах людзі абмяркоўвалі сітуацыю і прапаноўвалі фотаграфаваць машыны, якія спрабуюць праслізнуць без чаргі, каб перадаваць здымкі памежнікам.
Відэа інцыдэнту пазней апублікавалі таксама праўладныя тэлеграм-каналы, у тым ліку звязаныя з ГУБАЗіК.
Цяпер чытаюць
Марата Маркава перасунулі з пасады міністра інфармацыі ў міністры культуры32
Каментары