Чаму Беларусбанк рэзка знізіў стаўкі па іпатэцы і як гэта паўплывае на рынак нерухомасці?
Найбуйнейшы банк краіны — Беларусбанк — на месяц зніжае стаўкі па крэдытах на куплю жылля ў новабудоўлях да 13,75%. Раней стаўка для тых, хто не мае льгот, была 16,4-17,5%. Акрамя таго, у канцы верасня стаўкі па крэдытах знізіў і Белінвестбанк — з 16,8 да 15,5%. Навошта гэта банкам?
Банк стымулюе эканоміку
Эксперт BEROC Настасся Лузгіна мяркуе, што банк мог убачыць, што ў яго знізіўся попыт на крэдыты, і таму пайшоў на такі крок.
«Пры гэтым, абапіраючыся на планы і прагнозы, банк разумее, што можа дазволіць сабе некаторае зніжэнне па працэнтных стаўках, каб прыцягнуць больш кліентаў.
Хоць трэба разумець, што з улікам паскарэння інфляцыі стаўка ў памеры 13,75% па іпатэчным крэдыце з'яўляецца нізкай», — адзначае эканаміст.
У той жа час Лузгіна адзначае, што Беларусбанк — гэта банк вялікі і важны для эканомікі, які можа ўплываць на рынак крэдытаў і тым самым — на саму будаўнічую галіну. Таму працэнтную стаўку знізілі менавіта ў крэдытах на новае жыллё, а не другаснае.
«Такім чынам, Беларусбанк стымулюе людзей браць крэдыты менавіта на новае жыллё, чым павышае попыт на будаўніцтва. А гэта, у сваю чаргу, вядзе да ўзмацнення эканамічнага росту. Тым больш што менавіта будаўнічы сектар цяпер з'яўляецца адным з асноўных драйвераў беларускай эканомікі».
«Таму цалкам магчыма, што такім чынам вырашылі кароткатэрмінова стымуляваць рост эканомікі», — лічыць Лузгіна.
Як паўплывае на рынак?
У выпадку, калі акцыя, як і плануецца, будзе доўжыцца ўсяго месяц, сур'ёзнага ўплыву на рынак нерухомасці яна аказаць не зможа.
Хоць на нейкі перыяд варта чакаць адцягнення часткі попыту з другаснага рынку, паколькі некаторыя патэнцыйныя пакупнікі другаснага жылля могуць перагледзець свае перавагі на карысць новабудоўлі.
«Зніжэнне працэнтнай стаўкі ўплывае не толькі на суму штомесячных плацяжоў, але і на максімальную суму крэдыту, што можа быць аспектам на карысць куплі новага жылля», — звяртае ўвагу Лузгіна.
Тым не менш для больш прыкметнага ўплыву на рынак нерухомасці падобныя змены павінны насіць больш працяглы характар.
Эканаміст мяркуе, што нельга выключаць: калі за месяц дзеянні акцыі не паспеюць давесці паказчыкі да запланаванага ўзроўню, то яе могуць падоўжыць.
Цяпер чытаюць
На свой дзень нараджэння Зяленскі з Наўроцкім, Наўседам і Ціханоўскай у Вільні ўшануе памяць Кастуся Каліноўскага5
Каментары
Просты чалавек у банку атрымае кукіш.