У Брэсце спрабуюць выратаваць знясіленых аленяў з закрытага заакутка
Жывёлы да гэтага часу знаходзяцца ў былым жывым кутку ў парку імя 1 Мая, які працаваў амаль 20 гадоў, але быў закрыты ў 2025 годзе. Нягледзячы на гэта, частку жывёл адтуль так і не вывезлі — у тым ліку двух аленяў, піша Tochka.by.
Раней зоаабаронцы і валанцёры неаднаразова крытыкавалі ўмовы ўтрымання ў гэтым заакутку: людзі скардзіліся на цесныя вальеры, недахоп ежы і дрэнны стан жывёл.
Цяпер валанцёры збіраюць грошы, каб выкупіць аленяў і перавезці іх у «Дом Брэсцкага бусла», дзе ім гатовыя забяспечыць належныя ўмовы. Аднак зрабіць гэта задарма не атрымліваецца — ранейшыя спробы дамовіцца з гаспадарамі жывёл не далі выніку, і нават зацікаўленыя ў іх арганізацыі адмаўляліся з-за высокай цаны, тым больш што алені не маладыя.
Па словах валанцёраў, жывёлы выглядаюць знясіленымі і занядбанымі. Каб выратаваць іх, патрэбна каля 3850 рублёў.
Калі неабходную суму ўдасца сабраць, у гэтай гісторыі з’явіцца шанец на добры фінал, і алені змогуць жыць у значна лепшых умовах.
Каментары