Суд ва Уроцлаве пачаў разгляд справы аб серыі падпалаў гандлёвых аб’ектаў у рэгіёне Труймяста (Гданьск, Гдыня і Сопат) і Варшаве, якія адбыліся ў 2023—2024 гадах. Сярод шасці абвінавачаных — трое палякаў і трое беларусаў. Як сцвярджае польская пракуратура, яны дзейнічалі ў інтарэсах замежнай разведкі.
Усе шасцёра, паводле следства, уваходзілі ў арганізаваную злачынную групу і займа́ліся сабатажам, незаконным абаротам зброі і наркотыкаў, а таксама іншымі злачынствамі.
Найбольш абвінавачанняў выстаўлена беларусу Сцяпану Касцючэнку. Яму інкрымінуюць восем эпізодаў — ад удзелу ў злачыннай групе і падпалу рэстарана ў Гдыні да незаконнага захоўвання выбухоўкі і спробаў нанясення цяжкай шкоды здароўю. Таксама яго вінавацяць у двух актах сабатажу «па замове замежнай разведкі» — спробе падпалу склада ў Гданьску і падпале склада паддонаў у Марках пад Варшавай у 2024 годзе.
У гэтых жа падпалах, паводле даных пракуратуры, удзельнічалі беларусы Андрэй Белы і Яраслаў С. Першыя двое часткова прызналі віну, а Сцяпан Касцючэнка яе цалкам адмаўляе. Ён, Яраслаў С. і паляк Лукаш К. цяпер знаходзяцца пад вартай.
Акрамя таго, Сцяпана Касцючэнку падазраюць у падпале буйнога будаўнічага гіпермаркета ў Варшаве ў красавіку 2024 года — нібыта таксама па замове расійскай разведкі. За такія дзеянні польскі закон прадугледжвае пакаранне ад 10 гадоў да пажыццёвага зняволення.
Следства пачалося ў лютым 2024 года, а падставай сталі даныя Агентства ўнутранай бяспекі Польшчы. Пракуратура заяўляе, што група займалася вярбоўкай і арганізацыяй дыверсій для замежных спецслужбаў з мэтай выклікаць незадаволенасць у польскім грамадстве і падарваць давер да ўлады.
Стала вядома імя яшчэ аднаго беларуса, які па заданні ГРУ рыхтаваў дыверсіі ў Польшчы
Да падпалаў у польскіх гандлёвых цэнтрах датычны імаверны зяць беларускага дыпламата
Адным з затрыманых у Польшчы па «справе аб падпалах» беларусаў можа быць раней судзімы былы баец ММА
У Польшчы затрыманыя 32 чалавекі за супрацоўніцтва з расійскімі спецслужбамі. Сярод іх ёсць і беларусы
Арыштаваны дырэктар Палаца Рэспублікі, адзін з арганізатараў Марафона адзінства9
Каментары