Прэзідэнт ЗША па прыбыцці ў Шатландыю вечарам у пятніцу, 25 ліпеня, заклікаў еўрапейцаў адмовіцца ад ветрагенератараў і спыніць міграцыю, паведамляе Deutsche Welle.
«Ляціш над Еўропай — і паўсюль бачыш гэтыя ветракі, якія псуць вашы прыгожыя палі і даліны і забіваюць вашых птушак», — сказаў Трамп у аэрапорце Глазга Прэствік. Паводле яго слоў, ветрагенератары таксама наносяць шкоду мору.
Трамп таксама заклікаў Еўропу спыніць «жудаснае ўварванне» мігрантаў, якое, паводле яго сцвярджэння, разбурае Еўропу гэтак жа, як ветрагенератары разбураюць прыгажосць еўрапейскіх краін.
Трамп пагражае ЕС пошлінамі ў 30%
12 ліпеня Дональд Трамп заявіў, што з 1 жніўня мае намер увесці мытныя пошліны ў 30% на пастаўкі тавараў з Еўрасаюза. Ён патлумачыў гэта «адным з самых сур’ёзных гандлёвых дэфіцытаў» паміж Бруселем і Вашынгтонам.
Калі еўрапейскія кампаніі і краіны «вырашаць будаваць ці вырабляць прадукцыю ўнутры ЗША», яны не трапяць пад гандлёвыя пошліны, паабяцаў тады рэспубліканец. Але ён прыгразіў сіметрычным адказам, калі ЕС адкажа на гэта павышэннем сваіх пошлін на амерыканскія тавары.
Праз два дні ўлады Еўрасаюза падрыхтавалі спіс амерыканскіх тавараў на 72 мільярды еўра, якія трапяць пад пошліны, калі абвешчаныя Трампам меры ўвойдуць у сілу.
Каментары