Жанчына сцвярджае, што на працягу 15 гадоў жыла ў лясах 20 краін і самастойна нараджала дзяцей.
9 ліпені 2025 года ў паўднёваіндыйскім горадзе Гокарна (штат Карнатака) паліцыя выпадкова выявіла незвычайную жыхарку мясцовага лесу. Патрулюючы ў пошуках турыстаў небяспечную зону, дзе часам здараюцца апоўзні, інспектар паліцыі ў гушчары заўважыў статую індуісцкага бажаства, а за ёй — фіранкі з чырвоных сары, якія хавалі ўваход у пячору. Унутры ён знайшоў расіянку Ніну Куціну і дзвюх яе дачок, чатырох і шасці гадоў, паведамляе The New York Times,
Як высветлілася, 40-гадовая Куціна ўжо дзевяць гадоў жыве ў Індыі ў пошуках духоўнай гармоніі. У пячоры, дзе яе знайшоў паліцэйскі, сям'я правяла прыкладна тыдзень. Там жанчына медытавала пры святле свечак, займалася ёгай і гатавала ежу на прымітыўнай кухні на дровах. Сцены пячоры былі ўпрыгожаныя выявамі індуісцкіх багоў.
Нягледзячы на небяспеку, жанчына адмовілася пакідаць пячору. Толькі пасля доўгіх перамоваў паліцыя пераканала яе і дачок пераехаць у прытулак для жанчын, які кіруецца дабрачыннай арганізацыяй.
Паводле паліцыі, ураджэнка Краснаярска Куціна ўпершыню прыехала ў Індыю ў 2016 годзе па шасцімесячнай бізнэс-візе і спынілася ў Гоа — курортным штаце, які прыцягвае замежнікаў, што шукаюць духоўнасць.
Куціна пражыла ў краіне год пасля заканчэння візы, але ў 2018-м ёй дазволілі выехаць з Індыі. Затым яна накіравалася ў Непал, дзе знаходзілася 90 дзён па турыстычнай візе. Але ў 2020 годзе Куціна вярнулася ў Індыю ўжо па шматразовай турыстычнай візе разам з двума сынамі і дачкой.
Згодна з урадавымі запісамі, яе старэйшы сын загінуў у аварыі ў мінулым годзе ва ўзросце 21 года. Прах сына Ніна заўсёды насіла з сабой.
Дзе знаходзіцца другі сын Куцінай, якому цяпер 11, невядома. Адна з яе дачок нарадзілася ва Украіне, другая — ужо ў Індыі.
Як паведамляе The Hindustan Times, Куціна заявіла паліцыі, што яе сям'я «любіць прыроду», і што яна сама жыла ў лясах больш чым 20 краін за апошнія 15 гадоў.
«Мае дзеці нарадзіліся ў розных месцах. Я нарадзіла іх усіх сама, без бальніц і лекараў, бо я ведаю, як гэта рабіць. Мне ніхто не дапамагаў, я зрабіла гэта сама», — пераконвала яна.
Расійскія СМІ паведамляюць, што Куціна была замужам два разы. Першы яе муж, ад якога яна мела сына, трагічна загінуў. З другім мужам яна некаторы час жыла ў Маскве, затым ва Львове, падарожнічала па Каўказе і Карпатах, была ў Інданезіі, Малайзіі і Тайландзе. У гэтым шлюбе нарадзіўся другі сын. Пасля таго, як пара рассталася, Ніна адправілася ў Індыю.
У Гоа жанчына падпрацоўвала выкладчыцай у мясцовай школе для рускамоўных дзяцей. Яна неаднаразова наведвала Гокарну і, паводле паліцыі, праводзіла ў пячоры часам па некалькі тыдняў. Паліцэйскі, які яе знайшоў, расказаў, што Куціна ведае шмат пра прыроду, умее прыгатаваць простыя стравы з агародніны і мукі.
Пасля затрымання Куціна адправіла электронны ліст родным: «Наш спакойны пячорны рай скончыўся — наша жытло знішчана. За гады жыцця пад адкрытым небам у гармоніі з прыродай ніводзін звер ці змяя нам не нашкодзілі».
Аднак гэтым разам улады Індыі паставіліся да яе лёсу сур’ёзна. Жанчыну і яе дачок перавезлі ў Бенгалуру — сталіцу штата Карнатака, дзе органы міграцыйнага кантролю пастанавілі назіраць за сям’ёй і падрыхтаваць дэпартацыю ў Расію. Пакуль іх змясцілі ў спецыяльны цэнтр для затрыманых.
Як піша The Hindustan Times, паліцыя здолела адшукаць грамадзянскага мужа Куцінай і бацьку яе дзвюх дачок — 40-гадовага грамадзяніна Ізраіля Дрора Гальдштэйна.
«Я патрабую сумеснай апекі. Жадаю мець магчымасць сустракацца з імі, быць побач з імі і быць бацькам. Вось і ўсё», — цытуе словы мужчыны выданне.
У час размовы з псіхолагам расіянка расказала аб адносінах з Гальдштэйнам і аб тым, што нарадзіла малодшую дачку ў пячоры ў Гоа. Па яе словах, свае адносіны з ізраільцянінам, які гандлюе ў Індыі тэкстылем, яна не рэгістравала. Пасля нараджэння другой дачкі яны рассталіся.
Як паведамляюць СМІ, паліцыя спадзявалася, што Гальдштэйн зможа аплаціць білеты на пералёт. Ці вырашана гэта пытанне, невядома.
Асуджаны за «Гаюн» да хіміі брат Ігара Лосіка ўцёк з Беларусі3
Каментары