Лукашэнка быў у Маскве без георгіеўскай стужкі. Наяўнасць або адсутнасць стужак падзяліла гасцей парада на дзве групы

Аляксандр Лукашэнка не стаў надзяваць георгіеўскую стужку, хоць такія раздалі кіраўнікам іншых дзяржаў, якія былі гасцямі парада 9 Мая ў Маскве. У прыватнасці, з паласатымі стужкамі стаялі Уладзімір Пуцін і Сі Цзіньпін (на верхнім фота яны ў цэнтры).

Наяўнасць або адсутнасць стужак раздзяліла гасцей парада на дзве групы. Кіраўнікі Таджыкістана, Кыргызстана і Экватарыяльнай Гвінеі стужкі мелі.

Павялічыць

А вось кіраўнікі еўрапейскіх дзяржаў — Аляксандр Вучыч з Сербіі, Роберт Фіца са Славакіі (на верхнім фота яны ў другім шэрагу справа), а з імі і Аляксандр Лукашэнка (у другім шэрагу злева) — ад такога жэста ўстрымаліся. Не сталі надзяваць стужак і прэзідэнты Казахстана і Узбекістана, якія праводзяць палітыку балансавання між Расіяй, Захадам і Кітаем.

Павялічыць

Той жа варыянт выбралі туркменскі дыктатар Сердар Бердымухамедаў і армянскі прэм'ер Нікол Пашынян. Без стужкі быў і прэзідэнт Венесуэлы Нікалас Мадура.

Сам факт візіту ў Маскву быў праявай знаходжання на баку Расіі і Кітая ў новай халоднай вайне, у якую пагрузіўся свет, або, прынамсі, балансавання паміж двума вялікімі блокамі ці шматвектарнасці. З кіраўнікоў краін Еўрасаюза ў Маскву прыехаў адзін толькі славак Фіца. Устрымалася ад удзелу ў парадзе і кіраўніцтва Індыі.

Павялічыць

Аляксандр Лукашэнка, хоць і без паласатай стужкі, выкарыстаў прысутнасць на парадзе, каб падыграць кіраўніцтву Расіі.

Павялічыць

«Самы лепшы парад, які вы праводзілі ў Расійскай Федэрацыі. У савецкіх парадах я ўдзелу не браў — зялёны быў. А ўсе расійскія парады я бачыў. І магу сказаць, што гэта самы моцны парад», — сказаў ён.

«Некаторыя ахалі, охалі, што, можа, тэхнікі не хапала, асабліва паветранага эшалона. Вы ж разумееце — час ваенны. Таму не да таго, каб браць з фронту тэхніку і тут паказваць. Паказалі новыя ўзоры. Малайцы. Мы гэта ведаем. Мы закупілі такую тэхніку ў Расійскай Федэрацыі. Таму мяне цалкам задаволіла тое, што я бачыў», — адзначыў Аляксандр Лукашэнка.

«Цяпер паспрабуем гэта працягнуць у Мінску. У 20:30 у нас свой беларускі парад. Мы спецыяльна яго на вечар перанеслі. Бо трэба было пабываць у Маскве», — дадаў Лукашэнка.

Аляксандр Лукашэнка таксама заявіў, што Расія гатовая заключыць мір. Гэта быў адказ на пытанне, ці пагодзіцца зараз прэзідэнт Расіі Уладзімір Пуцін на перамір’е.

«Прэзідэнт Пуцін увогуле нікому нічога не павінен. Каб вы разумелі. Гэта першае. Што тычыцца перамір’я, я магу сказаць яго словамі. Мы з ім пра гэта гаварылі апошні раз у Валгаградзе. Яны гатовыя да гэтага. Расія даўно гатовая не проста да перамір’я, а каб мір заключыць», — сказаў Лукашэнка.

Павялічыць

Лукашэнку на парадзе ў Маскве пасадзілі побач з армянскім прэм'ерам Ніколам Пашынянам. У іх даўні канфлікт, яны неаднаразова абменьваліся колкасцямі і нават сварыліся на адным з самітаў. Але парад давялося глядзець разам. Пашыняну такое суседства відавочна не падабалася. На ўскладанні кветак ён спрабаваў трымаць дыстанцыю.

З другога боку ад Лукашэнкі ўпершыню пасадзілі яго сына Колю.

Георгіеўскія стужкі — практычна апошняе, што цяпер адрознівае публічную прастору Беларусі ад расійскай. За апошнія два тыдні Аляксандр Лукашэнка двойчы апраўдваўся з гэтай нагоды.

Павялічыць

Аляксандр Лукашэнка, 29 красавіка 2025 года. Photo by Contributor Getty Images

«Такая ўвага звязаная са спробай у пэўных колах штучна раскруціць гэтае пытанне і зрабіць пунктам звады ў беларуска-расійских адносінах. Бачачы гэтую тэндэнцыю, Аляксандр Лукашэнка прама і адкрыта адрэагаваў, каб спыніць магчымыя інсінуацыі», — паведамляла беларускае дзяржаўнае агенцтва БелТА.

«Ну мы вам адказалі з Уладзімірам Уладзіміравічам наконт стужак. Што мяне здзiвiла, ён кажа: «Слухай, раскажы мне, у чым штука». Я кажу: «Я думаў, гэта ад цябе ўсё ідзе». — Не, я ўпершыню чую. — Ну кажу, тады, напэўна, ад нашага супольнага сябра. — Ад каго? — Я кажу: «Ну як, ад Барыса Вячаслававіча (пасла Расіі Барыса Грызлова. — НН)». Засмяяўся (Пуцін. — НН), кажа: «Не, не можа быць». Ён кажа: «Адкуль?». Я кажу: «Ты паглядзі, можа, ад «Рассупрацоўніцтва» (расійскае агенцтва, якое падтрымлівае структуры ўплыву ў свеце, і адначасова шпіёнскае гняздо — НН). Я не сцвярджаю», — расказваў Аляксандр Лукашэнка падрабязнасці размовы з Уладзімірам Пуціным.

«Хочаце са стужкамі, я і яму сказаў — калі ласка, хочаце з нашымі стужкамі (яблыневым цветам — НН) — калі ласка. Хто як хоча. Мы ж свае людзі. Мы ж не носім свастыкі, як ва Украіне (фэйк і распальванне варожасці — ва Украіне таксама не носяць свастык — НН). Вы прапанавалі нам. У гэтым плане мы вызначыліся. Думаю, сваё павінна быць якое-небудзь адрозненне», — сказаў Аляксандр Лукашэнка.

Першы раз з-за георгіеўскіх стужак Аляксандр Лукашэнка раптам пачаў апраўдвацца на сустрэчы з Уладзімірам Пуціным у Валгаградзе.

«Ніхто не забараняе ні ў якім разе георгіеўскія стужачкі», — паспрабаваў пераканаць суразмоўцу Лукашэнка.

Пры гэтым ён прапанаваў Пуціну вывучыць гісторыю георгіеўскай стужачкі і назваў яе своеасаблівай. Але дадаў, што не мае нічога супраць.

«У нас ідэя абсалютна аднолькавая. Адна Айчына ад Брэста да Уладзівастока», — паўтарыў свой заезджаны тэзіс Лукашэнка.

На самай справе ў Беларусі замест георгіеўскай стужачкі ўжо даўно прыдумалі чырвона-зялёныя бутаньеркі з яблыневым цветам. Ідэолагі вырашылі дыстанцыявацца ад георгіеўскай стужачкі пасля 2014 года, калі яна стала трывала асацыявацца з рускім светам і захопам Данбаса.

З тых часоў прарасійскія актывісты сістэматычна крытыкуюць чыноўнікаў за негалосную забарону на георгіеўскія стужачкі. 

Масавая раздача георгіеўскіх стужак у Расіі пачалася ў 2005-м. Такім чынам пуцінскі рэжым спрабаваў стварыць новы ўніверсальны сімвал, прымальны для народаў былога СССР, замест дыскрэдытаванага савецкага сцяга. Пасля георгіеўскую стужку выкарыстоўвалі падчас захопу ўкраінскіх зямель у 2014 і 2022 гадах.

У рэгіёнах Беларусі масава раздаюць георгіеўскія стужкі «Рускія дамы».

Павялічыць

Георгіеўскія стужкі масава пранікалі ў Беларусь да 2014 года. Архіўнае фота Андрэя Стрыжака

У Валгаградзе ўвагу журналістаў звярнуў таксама эпізод раздачы каларадскіх стужак беларускім топ-чыноўнікам. Ігар Марзалюк застаўся з яблыневай.

Павялічыць

Фота прэс-службы Палаты прадстаўнікоў

• 0
• 1
• 9
• 3
• 1
• 0
• 0
• 0