Хацелі напісаць «расіст», а атрымлівалася «Трамп». У айфонах здарыўся дзіўны збой
Карыстальнікі айфонаў паведамілі, што ў некаторых выпадках прапанаваны кампаніяй Apple сэрвіс пераўтварэння маўлення ў пісьмовы тэкст запісвае слова «расіст» як «Трамп». У Apple заявілі, што спрабуюць выправіць праблему і сцвярджаюць, што яна звязана з тэхнічнымі непаладкамі. Але эксперты мяркуюць, што гэта хутчэй выглядае як жарт, чым як памылка, піша Бі-бі-сі.
Людзі вымаўляюць слова «расіст» падчас выкарыстання сэрвісу Dictation на iPhone. Часам яно транскрыбуецца правільна, але ў некаторых выпадках з’яўляецца слова «Трамп», пасля чаго хутка пераўтвараецца ў правільнае.
Тэхналагічны гігант мяркуе, што праблема з сэрвісам была выклікана складанасцямі з адрозненнем розных слоў, у якіх прысутнічае літара «r».
«Нам вядома пра праблему з мадэллю распазнавання маўлення, якая выкарыстоўваецца ў Dictation, і сёння мы выпусцім абнаўленне», — сказаў прадстаўнік Apple.
Журналісты Бі-бі-сі не змаглі ўзнавіць гэтую памылку, што можа сведчыць пра тое, што праграмнае забеспячэнне ўжо пачало змяняцца.
Аднак адзін з экспертаў у галіне камп’ютарнага распазнавання маўлення сказаў, што тлумачэнне Apple выглядае малаверагодным.
Прафесар Эдынбургскага ўніверсітэта Пітэр Бел мяркуе, што найбольш верагодна, што нехта наўмысна змяніў праграмнае забеспячэнне інструмента ў айфонах.
На яго думку, тлумачэнне Apple пра фанетычную блытаніну не мае сэнсу, бо гэтыя два словы не настолькі падобныя, каб збянтэжыць сістэму штучнага інтэлекту (ШІ), якая ўсталявана ў тэлефонах.
Мадэлі пераўтварэння маўлення ў тэкст навучаюцца праз аналіз кліпаў з рэальнымі людзьмі і дакладную расшыфроўку іх слоў.
Іх таксама вучаць разумець словы па кантэксце — напрыклад, ім прасцей адрозніць слова «чашка» ад слова «нарэзаць» (па-англійску гэтыя словы пішуцца амаль ідэнтычна — «cup» і «cut»), калі яны ўжываюцца ў фразе «кубак гарбаты» («cup of tea»).
Прафесар Бел лічыць, што інцыдэнт з Трампам наўрад ці можна звязваць з тэхнічнай памылкай, бо мадэль распазнавання англійскай мовы была навучана на сотнях тысяч гадзін маўлення, што павінна забяспечваць ёй высокі ўзровень дакладнасці.
«Хутчэй за ўсё, гэта сведчыць пра тое, што нехта мае доступ да тэхналогіі», — мяркуе ён.
Былы супрацоўнік Apple, які працаваў над яе ШІ-асістэнтам Siri, таксама сказаў газеце New York Times, што тое, што адбылося, «пахне сур’ёзным жартам».
У чацвер Apple абвясціла, што ў бліжэйшыя чатыры гады інвестуе ў ЗША 500 мільярдаў даляраў, у тым ліку ў будаўніцтва буйнога цэнтра апрацоўкі дадзеных у Тэхасе для забеспячэння працы сістэмы Apple Intelligence.
Генеральны дырэктар кампаніі Цім Кук таксама заявіў, што кампаніі, магчыма, давядзецца змяніць сваю палітыку ў галіне разнастайнасці, роўнасці і інклюзіўнасці (DEI) пасля таго, як прэзідэнт Дональд Трамп заклікаў спыніць гэтыя праграмы.
Цяпер чытаюць
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек33
Каментары