Шэран Стоўн расказала, якую галоўную параду дала б самой сабе, маладой, з вышыні пражытых гадоў
Пачуўшы гэтае пытанне, 66-гадовая актрыса раптам апускае галаву, закрывае твар рукой і робіць доўгую паўзу… а потым пачынае плакаць, піша Бі-бі-сі.
«Усё ў цябе атрымаецца», — саўладаўшы нарэшце з сабой, прамаўляе яна дрыготкім голасам.
Акторку захлістваюць цяжкія ўспаміны: 23 гады таму яе жыццё ледзь не абарвалася ў выніку інсульту.
«Ты проста пакуль гэтага не ведаеш, але ў цябе ўсё абавязкова атрымаецца, — паўтарае яна. — Гэтую фразу я б проста вытатуявала ў сябе на абодвух воках, з унутранага боку».
«Мне так часта хацелася, каб хоць хтосьці мне гэта сказаў», — прызнаецца яна.
«Калі я ляжала на падлозе і не магла нават выклікаць хуткую, — працягвае акторка. — Калі [з бальніцы] я вярнулася дадому і прачытала ў часопісе People, што аднаму богу вядома, ці ўдасца мне перажыць найбліжэйшы месяц».
Разрыў артэрыі прывёў да маштабнага кровазліцця ў мозг, справакаваўшы цяжкі інсульт. Паводле яе ўласных слоў, шанцы на выжыванне ў такіх выпадках складаюць прыкладна 1 з 100 — нават хадзіць і размаўляць ёй фактычна давялося вучыцца нанова.
Бяда не прыходзіць адна, нагадвае Стоўн. На фоне сур'ёзных праблем са здароўем у яе пачаліся фінансавыя праблемы, прытым што паралельна Стоўн даводзілася весці судовую цяжбу з былым мужам Філам Бранштэйнам за апеку над іх прыёмным сынам Роанам.
Як тлумачыць Стоўн, колькі цяжкасцяў ёй давялося пераадолець на гэтым шляху, яна ў поўнай меры ўсвядоміла, толькі пачуўшы гэта пытанне.
«З тых часоў прайшло ўжо шмат гадоў, але цяпер усё ў парадку… усё ззаду… у нас усё атрымалася».
Цяпер чытаюць
«Я толькі аднаго хачу: каб вы паверылі мне зноў». Як прайшла першая акцыя Ціханоўскага ў Варшаве пасля вызвалення11
Каментары