«Залезь назад у сваю скрынку». Cпецпрадстаўнік Трампа па Украіне паставіў на месца крамлёўскага мільярдэра Малафеева

Канстанцін Малафееў, расійскі праваслаўны алігарх, які знаходзіцца пад санкцыямі Захаду, заявіў у інтэрв’ю выданню Financial Times, што прэзідэнт Расіі Уладзімір Пуцін з высокай верагоднасцю адхіліць мірны план, прапанаваны адстаўным амерыканскім генералам Кітам Келагам, якога нядаўна Дональд Трамп прызначыў сваім спецпасланнікам па ўрэгуляванні канфлікту ва Украіне.

«Трамп зможа завяршыць канфлікт ва Украіне толькі ў выпадку, калі ЗША адмовяцца ад выкарыстання сучаснай дальнабойнай зброі, адхіляць украінскага прэзідэнта Уладзіміра Зяленскага ад улады, а таксама арганізуюць сустрэчу з Пуціным для абмеркавання глабальнага парадку на самым высокім узроўні, — заявіў Малафееў, —

Таму калі Келаг прыедзе ў Маскву са сваім планам без вышэйпералічаных пунктаў, мы прымаем яго і кажам яму ісці лесам, таму што ён нам не падабаецца. На гэтым перамовы скончацца.

А калі ЗША не адмовяцца ад падтрымкі Украіны, Расія можа выкарыстаць тактычную ядзерную зброю. Будзе зона радыяцыі, куды ніхто не ступіць цягам усяго нашага жыцця», — прыгразіў Малафееў у інтэрв'ю выданню Financial Times, якое выйшла 2 снежня.

Рэакцыя Кіта Келага на словы Малафеева не прымусіла сабе доўга чакаць. У гэты ж дзень спецпасланнік Трампа падзяліўся ў твітары фрагментам свайго выступу ў эфіры амерыканскага тэлеканалу Fox News, у якім рэзка адказаў Малафееву.

«Яму [Малафееву] лепш бы зразумець, хто такі Дональд Трамп, бо недаацэньваць яго — гэта вялікая памылка. Гэта не бачанне Кіта Келага. Мы гаворым пра бачанне Злучаных Штатаў і прэзідэнта Трампа. І ён справіцца з гэтым [урэгуляваннем вайны ва Украіне], як ён заўсёды з гэтым спраўляўся.

Таму мой адказ яму такі: залезь назад у сваю скрынку і лепш зразумей прэзідэнта Трампа, бо, відавочна, ты яго не разумееш, і, напэўна, ты зусім не разумееш ЗША», — адказаў спецпасланнік Трампа Кіт Келаг.

Thanks @SandraSmithFox @AmericaRpts for having me on today. Sandra always gets to the heart of an issue as she did at the close-underestimate President-elect Trump at your peril and never underestimate the United states of America. pic.twitter.com/oV7lJILpWs

— Keith Kellogg (@generalkellogg) December 2, 2024

Дэталі свайго мірнага плану Келаг раней выклаў у сваім артыкуле для America First Policy Institute у красавіку гэтага года. На першым этапе ўрэгулявання мяркуецца замарозка лініі фронту, спыненне агню і ўвядзенне дэмілітарызаванай зоны. Пасля чаго бакі сядуць за стол перамоваў, а Расія атрымае абмежаванае змякчэнне санкцый. Поўнае зняцце магчыма толькі пасля падпісання мірнага пагаднення, якое задаволіць Украіну.

Украіну не будуць прасіць адмовіцца ад акупаваных тэрыторый, але спатрэбіцца яе згода на тое, што яна будзе дамагацца вяртання страчаных зямель «выключна дыпламатычным шляхам». Пры гэтым Келаг лічыць, што такі дыпламатычны прарыў, верагодна, адбудзецца не раней, чым Уладзімір Пуцін пакіне сваю пасаду.

Акрамя таго, Келаг прапануе Украіне на нявызначаны тэрмін адмовіцца ад уступлення ў НАТА ў абмен на «мірнае пагадненне з гарантыямі бяспекі». ЗША павінны забяспечыць Украіне магчымасць «весці перамовы з пазіцыі сілы» і адначасова данесці да Расіі інфармацыю пра наступствы невыканання ёю будучых умоў мірнай дамовы, гаворыцца ў дакуменце.

Так Вашынгтон нібыта зможа дамагчыся дасягнення дамоўленасці аб заканчэнні ваенных дзеянняў на ўмовах, якія адпавядаюць амерыканскім і ўкраінскім інтарэсам.

• 19
• 1
• 4
• 2
• 1
• 0
• 1
• 1