Андрэй Дзмітрыеў з'ездзіў у Бундэстаг, каб давесці неабходнасць удзелу Лукашэнкі ў мірных перамовах
Былы палітвязень Андрэй Дзмітрыеў два дні знаходзіўся ў Берліне і вёў перамовы ў Бундэстагу, а таксама пагаварыў па тэлефоне з віцэ-старшынёй Еўрапейскага парламента Катарынай Барлі. Пра гэта сам палітык расказаў у сваім блогу ў інстаграме, піша Reform.news.
У 12-хвіліннай відэасправаздачы пра паездку Дзмітрыеў па сутнасці паўтарыў ключавыя тэзісы былога кіраўніка МЗС Беларусі Уладзіміра Макея. Той у размовах з заходнімі партнёрамі заўсёды тлумачыў, што нармалізацыя ўнутранай сітуацыі ў Беларусі магчымая толькі пры кроках Захаду насустрач рэжыму Лукашэнкі.
«Гэта шлях умацавання гэтых сувязяў, гэта шлях пошуку кантактаў. Размовы, якія сёння вельмі патрэбныя і якіх сёння вельмі моцна не хапае. Замест стратэгіі «ўсё ці нічога» патрэбна стратэгія step by step, «крок за крокам». І гэтыя крокі, вядома, павінны быць зробленыя абодвума бакамі ў бок нармалізацыі», — патлумачыў Дзмітрыеў.
Выказаўся ён таксама пра магчымы ўдзел Мінска ў мірных перамовах па спыненні расійска-ўкраінскай вайны.
«Для мяне вельмі важна, каб вось гэтыя мірныя перамовы, якія рана ці позна пачнуцца, стварылі новыя інструменты для ўмацавання незалежнасці і суверэнітэту Беларусі. А пагрозу я бачу ў тым, што яны могуць, наадварот, зафіксаваць, па сутнасці, што Беларусь зона ўплыву Расіі, хай там Расія і разбіраецца. І гэта будзе горшы сцэнар для нас, беларусаў. А каб так не было, трэба, каб Беларусь была прадстаўленая і каб нашы інтарэсы былі прадстаўленыя на гэтых перамовах. Таму мы таксама пра гэта вельмі шмат гаворым», — расказаў Дзмітрыеў.
Падводзячы вынікі размоў у Берліне, палітык адзначыў тры пункты — неабходнасць прысутнасці Беларусі ў парадку дня, умацаванне сувязі (па сутнасці — зняцце санкцый) і падтрымка беларусаў унутры краіны.
Пасля праведзеных сустрэч і перамоў Дзмітрыеў зноў вяртаецца ў Беларусь. Відавочна, гэтыя ягоны візіт у цяперашніх умовах не мог бы адбыцца без ухвалення ўладаў у Мінску.
Былы палітвязень Андрэй Дзмітрыеў выйшаў на волю ў красавіку 2024 года, цалкам адбыўшы тэрмін у калоніі. Ён быў асуджаны на 1,5 года пазбаўлення волі па ч. 1 арт. 342 («Арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх»).
Андрэй Дзмітрыеў не бачыць сэнсу вылучаць дэмакратычных кандыдатаў на прэзідэнцкіх выбарах-2025
Санкцыі перагледзець, паслоў вярнуць? Што стаіць за «маніфестам» Андрэя Дзмітрыева
«Дзмітрыеву сказалі: «Калі нешта не тое, адразу вернешся ў турму»
Дзмітрыеў просіць вярнуць паслоў у Мінск. «Санкцыі б’юць па людзях, а не па ўладзе»
Цяпер чытаюць
«Мы кідалі камяні, каб яны не ўзляталі». Адным з тых, хто спрабаваў спыніць дроны, што выляталі з фур, быў беларус Антон33
Каментары